Mutilen Euskal Ligako partidua jokatu behar zuen gaur bertan Hernanik, Laredoren aurka Kantabriako herrian, baina norgehiagoka bertan behera uztea erabaki da. Bi taldeak ados jarri dira, Hernani eta Laredoko egoera, COVIDaren ondorioz, une honetan nolakoa den ikusita.
Dagoeneko hiru partidu atzeratu ditu Hernanik, eta hauek berreskuratzeko pandemiaren etenaldi bat beharko da. Entrenamenduetara itzuli da taldea eta egoera baretzea espero dute, «ahal den neurrian konpetiziora itzultzeko» diote klubeko arduradunak.
Atzo jubenil eta kadete neskak ere entrenamenduetara itzuli ziren, eta astelehenetik aurrera infantilak ere itzultzeko ideia zegoen, baina Eusko Jaurlaritzaren agindu berrien ondoren nola itzuliko diren aztertzen ari da Hernani. Dekretu berriaren arabera taldeko edozein kirol-jarduera (profesionala eta erdi-profesionala izan ezik) bertan behera utzi da, gimnasioetan, kiroldegietan eta igerilekuetan programatutako jarduerak egiteko aukerarekin, betiere maskara erabiliz, 6 pertsonako taldeetan eta %40ko gehieneko edukierarekin.