Bertan behera utzi behar izan ditu irteerak, oraingoz behintzat, Mendiriz Mendi elkarteak; baina elkarrekin mendira joango ez diren garai honetan, mendizaletasuna ekarriko dute Biterira, beste urte batez. Izan ere, Mendizale Astea bai, antolatu du elkarteak. Azaroaren 2tik 6ra egingo dute, eta saio bana izango du arratsaldero.
Horrela, hainbat abentura eta bestelako gai interesgarriak ekarriko dituzte Biteriko aretora, mendiarekin zerikusia duten arlo ezberdinetakoak.
Armeniako natura eta kultur ondarea, ezagutzera
Iñaki Zuzak eskainiko du aurreneko saioa, astelehenarekin, arratsaldeko 19:30etan hasita, Biterin. Eta Armeniako natura eta kultur ondarea emango ditu ezagutzera Zuzak, aurtengo Mendizale Asteari hasiera emateko. Izan ere, mendiarekin oso lotuta dagoen herrialdea da.
Kaukaso mendikatearen hegoaldean dago Armenia, Europa eta Asiaren artean, eta muga egiten du Georgia, Azerbaijan, Iran eta Turkiarekin. «Bertako mendi eta baso paisaia harrigarrietan, antzinako eliza eta monasterio ederrak daude», aurreratu du. Eraikin horietako asko, hain justu, Gizateriaren Ondare izendatu ditu Unescok.
Mendiko bizikletarekin abentura, Nepalen barrena
Nepalera eramango ditu herritarrak, Mendizale Asteko bigarren proiekzioak. Izan ere, hango mendi inguruetan bizikletarekin egindako abentura ekarriko du Raul Diazek, bideo emanaldi batekin. Arratsaldeko 19:30etan izango da hori ere.
«Joan den udazkenean egin genuen Nepalera bidaia, mendiko bizikletarekiko zaletasuna daukagun lagun batzuk. Eta bidaia horretan, Manaslu eta Annapurnako trekkingak egin genituen bizikletan, 17 egunetan zehar», azaldu du Diazek.
Etapa horietan, «hainbat bidezidor malkartsu» ere gainditu behar izan zituzten, pedalei eraginez. «Abentura zoragarria» izan zela nabarmendu du Raul Diazek, eta egun horietan ateratako argazkiekin eta grabatutako bideoekin, ikusentzunezko muntaia bat prestatu dute, Mendizale Astean eskainiko dutena. «Gure esperientzia zuekin partekatu nahi dugu», azaldu du.
Facebooken ere eman dute abenturaren berri, Mannapurna izeneko orrialdean. Egunez egun bizitakoa kontatu dute bertan, abenturako protagonistek.
Eskalada jasangarria hizpide, Gipuzkoako Mendizale Federazioak
Mendiko beste atal bati egingo diote lekua asteazkenean, Mendizale Astearen hirugarren egunean. Izan ere, Gipuzkoan eskalada jasangarria egiteari buruz hitz egitera etorriko dira Gipuzkoako Mendizale Federazioaren ordezkariak. Aurrekoak bezala, Biterin izango da hori ere, arratsaldeko 19:30etan hasita.
«Eskaladaren joko eremua ingurune naturalean dago. Fauna eta flora espezieekin batera bizi gara, interes geologikoa duten lekuetan jarduten dugu, eta baita balio kultural haundiko arkeologia aztarnategiak dituzten zonaldeetan ere», azaldu dute. Horregatik diote, «gure betebeharra» dela hori guztia errespetatzea. Eta era berean, diote pertsona askoren lantokia eta bizilekua ere badela landa ingurunea: «beraz, bizikidetzarako oinarrizko arau batzuk errespetatu behar ditugu».
Hori guztia lantzera dator Gipuzkoako Mendizale Federazioa, Biterira: «eskalatzaileok sustatu behar dugu ingurumena errespetatzen duen eskalada, epe luzera gozatu ahal izateko». Eta jakinarazi dute, «guztiz eguneratu dutela», duela urte batzuk argitaratu zuten dekalogoaren edukia. Hori horrela, eskatu dute bertan emandako aholkuak jarraitzea, eskalatzerakoan.
Angel Beldak eskainiko du osteguneko proiekzioa, azaroaren 5ekoa; baina oraindik ez dute aditzera eman, zeri buruz ariko den. Aurrekoak bezala, Biterin izango da hori ere, arratsaldeko 19:30etan.
Gaztetxoei dominak eta argazkilari onenei sariak, astea bukatzeko
Eta urteroko hitzordu batekin emango diote bukaera, aurtengo Mendizale Asteari. Ostiraleko hitzordua 18:00etan izango da, Biterin bertan, eta saio bikoitza prestatu dute.
Hasteko, gaztetxoak izango dira protagonista, proiekzio berezi batekin. Izan ere, gaztetxoen irteeretako irudiak jarriko dituzte, aurten normalean baino gutxiago izan badira ere. Eta ondoren, dominak banatuko dizkiete, irteeretan parte hartu duten gaztetxo guztiei.
Ostiraleko saioaren bigarren zatia, berriz, argazki lehiaketari eskainiko diote: sari banaketa egingo dute bertan. Bost sari banatuko dituzte aurten: Hernaniko argazki onena, mendiko argazki onena, paisaia baten argazki onena, argazki herrikoiena, eta bilduma onena. Saritu bakoitzak, 75 euro eta trofeoa jasoko du.
Argazki herrikoiena aukeratzeko, 15 argazki aukeratuko dituzte epaimahaikideek; eta ondoren, ostiralean, bertaratutako herritarrek bozkatuko dute zein duten gustukoen. Boto gehien jasotzen dituenak eskuratuko du bosgarren sari hori.
Eta Mendizale Astea bukatzeko, proiektatuko dituzte elkarteak urtean zehar egindako jardueretako argazkiak, ostiralean bertan, dominak eta sariak banatu ondoren.