Koronabirusa dela eta, martxoan bertan behera gelditu zen Espainiako Musika Independentearen sari banaketa. Maite Larburu musikari hernaniarra MIN sarietarako nominatua izan zen, Doctor Deseo, Niña Coyote eta Chico Tornado, Zea Mays eta Zetak musika taldeekin batera. Orain, sari banaketa bueltan dela iragarri dute, eta bihar izango da, streaming bidez. Telebista erabiliko da euskarri gisa ikuskizuna eskaintzeko: Movistar+ katean eskainiko da, eta Leonor Watling aktore eta abeslariak aurkeztuko du gala.
Euskerazko album onena sarituko dute, bihar gauean
Etxepare Euskal Institutuak euskerazko album onena sarituko du 2020ko MIN sarien ekitaldian, eta Maite Larburu hernaniarra finalisten artean dago. Hezurren azpian da sarietarako izendatua dagoen Larbururen diskoa. Halaber, sariketak beste 18 kategoria ditu, tartean Artistarik Onenaren AIE saria, Zuzeneko Onenaren Eventbrite Saria, edota Album Onenaren The Orchard saria.
Gutxi gorabehera ordu eta erdi iraungo du larunbatean telebista bidez eskainiko den ekitaldiak. Horretan, sariak banatzeaz gain, «oraindik argitu gabe» dauden artista batzuen zuzeneko ikuskizunak ere izango direla jakinarazi du Etxepare Euskal Institutuak bere webgunean.