Gaur emango zaio hasiera, Amherrek antolatutako Migrazineari. «Migrazioaren gaiak dituzten filmak ikusi, aztertu eta eztabaidatzeko saioak izango dira», eta iraila eta urria bitartean proiektatuko dira, Biterin. Guztira 6 pelikula eskainiko dira, eta horietako 3 «saio bereziak» izango dira; Goiz Eguzkik, Plaza Feministak eta Hernaniko Gaztelekuak bat egin baitute, aurtengo proiektuarekin.
Saioak doakoak izango dira, aretoa bete arte, gainera behin filma amaituta, «filmetan islatutako zenbait gairen inguruko eztabaida dinamizatua egingo da».
'El Médico Africano' filma, gaur
Gaurko saioa, berezia izango da, Goiz Eguzkirekin elkarlanean antolatutako saioa delako. Gainera, hiru ordu eta erdiko iraupena izango du, 10:00etatik 13:30etara bitartean, hain zuzen.
Julien Rambaldiren zuzendaritzapean, filmak 1975 urtean Kinshasako mediku graduatu berri batek, Frantziako herri txiki batean lanpostu huts bat onartu ondoren sortzen zaizkion gertaerak kontatzen ditu. Antolatzaileek jakinarazi dute, «musukoa derrigorrezkoa» izango dela.