Iruñeko Labrit frontoian jokatuko du Ioritz Arrieta pelotariak, bihar arratsaldeko 19:00etan, Espainiako txapelketako finalerdia. Urtarrilean jokatutako Espainiako Txapelketan porrota gogorra jaso zuen hernaniarrak, Espinal nafarraren kontra. Hala ere, denboraldi ofizialeko partida garrantzitsuenetarikoa da, eta Arrieta txapela irabazteko prest azalduko da ostiralean.
Aurten, San Cristobal elkartearekin ari da jokatzen Arrieta, eta eskuz banakako modalitatean arituko da bihar, Iruñean. Norgehiagokan, Julen Retegi edo Albero Ongay izango du aurkari. Retegi eta Ongay Irurtzun elkarteko pelotariak dira, biak ere ASPE enpresako esku pelotari profesional ohiak.
Igandean jokatuko da txapelketako finala
Arrietak ostiraleko partida irabazten badu, igandean jokatuko du finala. Labrit frontoian izango da hori ere, goizeko 10:00etan. Ostiralean Iker Espinal eta Xabier Santxo elkarren aurka lehiatuko dira, eta partida honen garailearen aurka ariko da Arrieta igandean, ostiraleko aurkaria garaitzea lortzen badu.
Finalerdiak eta finala zuzenean ikusteko aukera izango da, Espainiako Federazioak eskuragai jarriko duen YouTube kanaleko loturaren bidez.