Datorren ostegunean abiatuko da OndarHernani ekimena. Kontaiguzu Ondarea! Ondarea eta Hezkuntza da 2020ko Ondarearen Europako Jaurdunaldiaren programaren izenburua, eta aurten Hernaniko Udalak aurreneko aldiz hartuko du parte ekimen honetan. Europako Kontseiluaren jarduera da, eta ondarea herritarrengana hurbiltzea du helburu.
Ondarea osatzen duten elementuen gaineko sentsibilizazioa eta kontserbazioa sustatu nahi da programa honekin. Edizio honetan, antolatutako jarduerek transmisioaren zereginetan jarri nahi dute arreta, «betiere ondarea kontserbatzeari eta gozatzeari begira».
Programa hau Gipuzkoako Foru Aldundiko Kultura Sailak koordinatzen du. Guztira ehun bat jarduera eta 150 ekitaldi inguru programatzen dira lurralde osoan zehar; eta aurten 38 udalerritan egingo dira ekitaldiak, iraila eta azaroa bitartean. Interesa duenak, jardunaldi hauen berri ematen duten liburuxkak eskura ditzake, Biteri kultur etxean, turismo bulegoan edo udal artxiboan. Ondorengo webgunean ere eskura daiteke informazio guztia: gipuzkoa.eus.
Hiru jarduera, Hernanin
Ekimen honen helburuarekin bat egin nahi izan du Udalak, programaren bosgarren edizio honetan. «Hernaniko Ondarea ikustarazteko aukera ematen digu, duela urte batzuk antolatzen ari garen egitasmoei zabalkunde haundiagoa emateko aukera ematen digulako». Horrela, hiru proposamen egin ditu Udalak, iraila eta urria bitartean egiteko: datorren ostegunean, ondarea.hernani.eus webgunearen aurkezpena izango da Biterin, arratsaldeko 19:30etan. Urriaren 3an, San Joan Bataiatzailea parroki-elizara bisita komentatua (erderaz, soilik) izango da. Eta azkenik, alde zaharreko bisita komentatua egingo dute, urriaren 17an; euskeraz eta erderaz, txanda ezberdinetan.
