Emakume idazleak ezagutarazteko helburuarekin, lau saio izango ditu Kattalin Miner hernaniarrak gidatutako mintegiak. Aurreneko saioa gaur izango da Udal libututegian, arratsaldeko 19:00etan. Gainontzekoak hilabetean behin egingo dira, abendura arte: urriaren 13an, azaroaren 16an eta azkena, abenduaren 9an. Gaurkoaren moduan, saio guztiak arratsaldeko 19:00etan hasita izango dira, liburutegian bertan. Edukiera mugatua denez, sarrerak aurrez eskuratu behar dira liburutegian.
Gaurko saioa berezia izango da, Mari Luz Esteban ere izango delako Minerrekin batera. Gizarte-antropologiako irakaslea da Esteban, Euskal Herriko Unibertsitatean. Antropologia feministan, eta medikuntzako antropologian aditua izanik lau liburu ezagun argitaratu ditu. Joan den hilabeteetan zuen Udal liburutegian bere liburu baten aurkezpena egiteko zita, baina egoera dela eta bertan behera gelditu behar izan zuen aurkezpenak.
Gaur, Emakumeen euskal literatura ikuspegi feministatik mintegia aurkeztuko dute Miner eta Estebanek. Antolatutako saioetan euskerazko emakume idazleen lan garaikideak ikuspegi feminista batetik irakurri eta landuko dituzte. Gainera, egun gartatzen diren kezka, diskurtso eta proposamenak mintegian dauden guztien artean hausnartuko dira. Eta era berean, ikuspegi horiek, genero ikuspegi eta ikuspegi feminista batetik irakurtzea da mintegiaren beste helburu nagusietako bat.
Hurrengo saioa urriaren 13an izango da, eta Katixa Agirreren Atertu arte itxaron liburua landuko dute. Azaroaren 16an Hezurren erretura izango da protagonista, Miren Agur Meaberena. Hirugarren saio honetan idazlea bertan egongo dela jakinarazi dute antolatzaileek. Eta azkenik, abenduaren 9an Uxue Apaolazaren Umeek gezurra esaten dutenetik liburua irakurri eta landuko da.