20 urte beteko ditu Chillida Lekuk, asteazkenean; eta museoa zoriondu nahi izan du Hernaniko PSE-EEk, urteurren borobilean. Museo «zoragarria» dela goraipatu du Ricardo Crespo bozeramaileak, kultura eta natura uztartzen baititu; eta bere garrantzia nabarmendu du: «bestela izango ez zuen ikusgarritasuna ematen dio gure herriari». Izan ere, uste du «aukera» bat dela museoa, Hernaniko eta eskualdeko turismoarentzat; eta horregatik, Udala animatu du museoarekin elkarlanean aritzera, herriko turismoaren sektorea indartzeko, Chillida Leku bere ekintzen «erreferentziazko gune» bilakatuz.
«Faktore bereizgarria da Chillida familiak bultzatutako museoa, eta aukera eman digu bisitarientzako toki paregabe gisa nabarmentzeko», azaldu du: «pandemiaren amesgaizto hau bukatzen denean, Chillida Leku tresna garrantzitsua izango da ekonomia berreskuratzeko, nazioarteko turismoarentzat itsasargi bilakatuko delako berriro».
Crespok gogorarazi du, gainera, Time aldizkariak Chillida Leku sartu zuela bisitatzeko munduko toki onenen zerrendan (World's Greatest Places 2019); eta nabarmendu du Espainia mailako bakarra izan zela museoa, iazko zerrenda horretan.