Kontxako Banderaren bigarren jardunaldia jokatu zen atzo, Donostian; eta bertan izan ziren hainbat arraunlari hernaniar, eta beste hainbat Maialen traineruan aritutakoak. Horietatik, sei izan ziren atzokoan arraunean egin zutenak, lau talde ezberdinekin; eta guztiek errepikatu zuten aurreko igandeko postu bera, atzokoan.
Emakumezkoetan, ohorezko txandan aritu zen Eider Barba, Tolosaldearekin; eta laugarren bukatu zuen, Donostiarra bigarren sailkatuarekin eta Arraun Lagunak hirugarrenarekin oso lehia estuan aritu ondoren. Beste txandan aritu ziren, aldiz, Nerea Irastorza eta Jone Pastor Hibaikarekin, eta Naroa Lizarreta eta Nahia San Argimiro San Juanekin. Seigarren izan zen Hibaika atzo, eta zortzigarren San Juan. Sailkapen nagusian ere, postu berdinetan bukatu zuten hiru traineruek.
Eta gizonezkoetan, Donostiarraren traineruan izan zen Xabat Pastor, beste behin. Seigarren izan zen Donostiarra atzo, aurreko igandean bezala, eta postu horretan bukatu du Kontxako Banderako lehia.
Oriok astindu zuen bandera emakumezkoetan, eta Hondarribiak gizonezkoetan. Haunditu egin zuten biek atzo, aurreko igandean lortutako errenta.