Lehiaketa berezia jarri du martxan Dobera Euskara Elkarteak, «haur, gazte eta helduen artean euskal kultura, sorkuntza eta irakurzaletasuna sustatzeko asmoz». Kromiki Lehiaketa antolatu du, adin guztietako sortzaileei zuzenduta. Izan ere, hiru kategoria izango dira: haurrak (6-11 urte), gazteak (12-17 urte), eta helduak (18 urtetik gora).
Hernanirekin zerikusia duten komikiak izango dira, eta testuek euskeraz idatzita behar dute. Tamaina, Kronikan argitaratzen diren Kromikien berbera izango dute: 26 zentimetroko zabalera, eta 7,3 zentimetroko altuera. Txuri-beltzean zein koloretan egin daitezke.
Lanak aurkezteko epea, urriaren 16ra arte
Aurkeztutako lanek originalak izan behar dute, beste inon aurkeztu gabekoak; eta Kromikiak ezin du egilearen izenik izan agerian. Partehartzaile bakoitzak, Kromiki bakarra aurkeztu ahal izango du. Urriaren 16ra arte izango da lanak entregatzeko epea, eta euskarri fisikoan zein digitalki aurkeztu daitezke; bietan, plika-sistema erabiliko da, lehiaketaren gardentasuna bermatzeko.
Euskarri fisikoan entregatzeko, Doberaren bulegora (Larramendi kalea 11, behea) eraman behar da: Kromikia gutunazal haundi batean sartu behar da, kanpoan izengoitia jarrita; eta gutunazal txikiago batean sartu beharko da plika, egilearen izen-abizenak, adina, kategoria eta harremanetarako datuak zehaztuta. Bulegora azaldu aurretik, komeni da elkartera deitzea, hitzordua zehazteko.
Modu digitalean aurkezteko, aldiz, PDF formatuan bidaliko da Kromikia, dobera@dobera.eus helbide elektronikora. Aurreko sistema bera bermatzeko, bi dokumentu bidali beharko ditu partehartzaile bakoitzak: batean Kromikia bera egongo da, eta bestean plika, datu pertsonalekin. Aurreneko dokumentuari, izengoitia jarri beharko zaio izenburu gisa; eta bigarrenari, berriz, (Izengoitia)ren plika.
Hiru Kromikilari, epaimahaikideak
Lan guztiak jasota, epaimahaiak baloratuko ditu. Kronikako hiru Kromikilarik osatuko dute epaimahaia, hain justu: Ana Almandozek, Alai Zubimendik, eta Ainara Azpiazu Axpik.
Hirurek elkartuta ebaluatuko dituzte lanak, eta azaroaren 2a baino lehen emango dute epaia. Sare sozialen eta dobera.eus web orriaren bitartez zabalduko ditu irabazleen izenak, Doberak.
Sari hirukoitza, kategoria bakoitzeko irabazleak
Kategoria bakoitzean, sari hirukoitza jasoko du irabazleak: komiki sorta bat, bere Kromikia Kronikan argitaratzea, eta ilustratzaile-epaileen ilustrazio pertsonalizatua. Haurren kategoriako irabazleari Ana Almandozek egingo dio, gazteen kategoriakoari Alai Zubimendik, eta helduetan irabazten duenari Ainara Azpiazu Axpik.
Gainera, lehiaketara aurkeztutako Kromiki guztiekin, liburuxka bat osatuko du Doberak, eta PDF formatuan helaraziko die partehartzaile guztiei. Doberaren webgunean ere jarriko da, deskargatzeko moduan.
Komikien inguruan, zenbait azalpen eskaini dizkie Alai Zubimendik, bideo bidez, parte hartu nahi dutenei: