Ostegun honetan emango diote amaiera 'Izan Aktibista' kanpainari. Kanpaina hau Hernaniko Udalak COVID-19ak sortutako krisiari aurre egiteko egindako ekintza planaren baitan kokatzen da, eta Hernaniko merkataritza, ostalaritza, zerbitzu eta turismo sektoreetako enpresak laguntzeko kanpaina da.
Kanpainaren amaiera irailaren 18ko Merkataritza Festa egunean zen egitekoa, «zortearen erruleta», baina bertan behera geratu da egun hori. Horregatik, kanpainan parte hartu duten herritarren artean sariak banatzeko megazkozketa egingo da ostegun honetan. Eta zozketa erraldoiarekin amaiera emango diote kanpainari.
Udaletxeko YouTube kanalean
Sarien zozketa publikoki egingo da arratsaldeko 19:00etan, Udaletxeko YouTube kanalean. 45 sari zozketatuko dira guztira: 21 sagardo sorta, 2 bizikleta, 5 argazki makina, helduentzako 5 pala, 2 bozgorailu (haundia eta txikia), 3 ordenagailu eta 3 inprimagailu (3 sari), telebista bat, ebook bat, gamer aulki bat, rumba xurgagailu bat, zartai sorta bat, hortzetako eskuila elektrikoa eta eskuoihalak (sari bakarra), eta inprimagailu bat. Antolatzaileek adierazi dute sari guztiak Hernaniko komertzioetan erosi direla.
Udaletxeko kideen esanetan, osteguneko zozketa dinamizatua izango da. «Kanpainaren parte izan diren herriko tabernariei animatzen diegu ostegunean YouTube kanalean sartu eta zozketaren bideoa ikusgai jartzeko beraien tabernetan, bertan dauden bezeroek ikus dezaten». Eta kanpainaren arira, Udalak adierazi du urtean zehar ere bestelako ekintzak egingo dituztela. Guzti honen berri aurrerago emango dute eta informazioa eskuragarri jarriko dute.