Egoiliarra joan zen astean kalean izandako bisita baten bidez kutsatu zen, eta emaitza jakin ondoren, egoiliar hori beste zentro batera eraman dute. Kutsatutako egoiliar horrekin azken egunotan harreman zuzena izan duten egoitzako langileak identifikatu dituzte zerbitzu horretako arduradunek eta 10 egunez etxean egon beharko dute berrogeialdian. Egoiliarrei dagokienez, positiboa eman duten pertsonarekin kontaktuan egon direnak isolatuta daude egun. Helburua da ahalik eta lasterren egoiliar eta langile guztiei PCR proba egitea. Gaur bertan, modu urgentean egingo zaie proba kutsatutakoarekin harreman estua izan dutenei, eta behar den materiala eskatu da gaur, bihartik eta asteazkenera bitartean, kontaktu zuzena izan ez duten beste langile eta egoiliar guztiei ere PCR proba egiteko.
Atzo goizean positiboaren berri izan bezain laster, Hernaniko alkate eta Zerbitzu Sozialetako presidente Xabier Lertxundi Asteasuinzarrak bilera egin zuen egoitzaren arduradun guztiekin, hartu beharreko neurriak adosteko asmoz. Hernaniko arduradunak Osakidetzarekin eta Foru Aldundiarekin elkarlanean hartzen ari dira erabaki hauek guztiak, halako kasuetan ezarrita dagoen protokoloaren arabera.
Senideen bisitak bertan behera gelditu dira
COVID-19aren zabalpena saihesteko helburuarekin, senideen bisitak eta egoiliarren irteerak bertan behera gelditu dira adinekoen egoitzan. Egoiliarrei egoeraren berri ematen ari dira bertako langileak lasaitasun mezua zabaltzeko. Horien senitartekoei ere deiak egiten ari zaizkie egoeraren jakitun izan daitezen. Era berean, pertsona hori egon den gela eta azpiegitura guztiak desinfektatuko dira, baita komun guztiak ere.
Eraikin berean dauden gizarte langileen jardunean ere eragina izango du honek. Horregatik, hemendik aurrera telematikoki emango dituzte hitzorduak eta kontsultak. Jangela sozialaren zerbitzua ere bertan behera gelditu da eta ohiko erabiltzaileei etxera eramango zaie janaria.