Udako zinemaldia atzo hasi zen Atsegindegin. Guztira hiru pelikula proiektatuko dira, munduko hiru herrialde ezberdinetan egin direnak. Atzo Islandia izan zen protagonista, Hrútar filmarekin, eta gaur Japonen txanda da. Gaueko 22:00etan hasiko da proiekzioa, Atsegindegin. Naomi Kawasek zuzendutako Mogari no mori filma izango da pantailan; euskerara itzulita, «basoaren dolua» esan nahi du.
Atzokoaren antzera, ekoizpen honek ere arrakasta izan du. Izan ere, 2007an Epaimahaiaren Sari Nagusia jaso zuen, Cannesen.
Aurkikuntza bidaia bat
Aurkikuntza bidaia bat da, zaharren egoitzan bizi den gizon batek bertako zaintzaileetako batekin, basoan barrena doazela, elkarrekin egingo dutena.
Shigeki zaharretxe txiki batean bizi da, eroso eta pozik. Machikok, bertako langileetako batek, beste paziente batzuei baino arreta gehiago eskaintzen dio Shigekiri. Hala ere, Machikok sekretupean bizi du bere oinazea semea galtzeagatik. Baina Shigekiren urtebetetze ospakizuna eta gero, Machikok mendira paseatzera eramatea erabakiko du eta konfidentzia ugari izango dituzte bidaia horretan.
Bihar izango da Udako zinemaldiaren azken eguna. Kovasikajuttu (Punk Sindromea) da izenburua eta finlandiar pelikula honetan osasun mentalaren ispiluaren beste aldean gertatzen dena jasotzen da.