Igandeetan abuztua barne, txistulariak kaxkoan jotzeaz gain auzoz auzo dabiltza euren soinu eta doinuak zabaltzen. Azken bi igandeetan Elizatxon eta Santa Barbara auzoan izan dira. Azken honetan, «harridura haundiz eta pozez hartu gaituzte; izan ere, inoiz ez bait gera bertan egon jotzen» ezagutarazi nahi izan dute txistulariek.
«Bizilagunek bideoak eta argazkiak atera dituzte eta txalo zaparrada jaso dugu. Eskertzekoa da horrelako harrera ona».
Ez da esperientzi on bakarra izan. Madalena egunean hirugarren adinekoen egoitzara egindako bisita dela eta, alkatearen eskertza jaso du herriko txistulari bandak.
«Eskerrak eman nahi dizkizuet egoiliarrei urtero bezala Madalena egunean dianaz gozatzeko aukera emateagatik. Aurten inoiz baino gehiago, bizi ari garen egoeragatik, berezia izan da egoiliarrentzat eta horrela jakinarazi digute» dio mezuan Lertxundi alkateak.