COVID-19aren pandemia bizi dugun une honetan, «beste pandemia» batekin gogoratzeko deia luzatu du Elkarrekin Podemos-Orain Hernani udal taldeak, adierazpen baten bitartez. «Oso une zailak bizitzen ari gara COVID-19aren pandemia honekin; ia ezer jakin gabe, asko hitz egiten da horretaz. Baina bada beste pandemia bat, eta horri buruz asko dakigu, baina ez da horrenbeste hitz egiten, eta ez da behar adina ikusarazten: emakumeenganako indarkeria, emakume izate hutsagatik», adierazi du.
Gaineratu du, «mundu osoko benetako pandemia» dela indarkeria matxista: «eta Hernani ez dago horretatik libre. Azken hilabeteotan, Hernaniko emakumeen aurkako ustezko erasoen berri izan dugu; orain arte isildutako erasoak. Ziur askoz ere gehiago izan direla, baina ez da horietaz hitz egin, eta ez da hitz egingo».
«Beldurra eta zurrumurruak», bi pandemia horien arteko «faktore komunak»
Zentzu horretan, Orain Hernanik uste du «hainbat faktore komun» daudela pandemiaren eta emakumeen aurkako indarkeriaren artean: «aurrenekoa, beldurra. Beldurrak geldiarazi egiten gaitu, blokeatu, ez digu argi pentsatzen uzten. Batez ere, erasotzailea edo erasotzaileak gure familiakoak edo ingurukoak direnean, eta ez direnean ezezagunak guretzat».
Bi pandemien arteko beste faktore komun bat ere aipatu du Elkarrekin Podemos-Orain Hernanik: «zurrumurruak sortzea, ezjakintasunaren ondorioz, beharrei erantzutea zailtzen dutenak. Beraz, premiazkoa da egia ezagutzea eta ez ezkutatzea», nabarmendu du udal taldeak.
«Kontzientziak piztu eta beldurra desagerrarazteko erantzukizuna daukagu»
Hori horrela, Orain Hernanik dio, gizarte gisa lan egin behar dela, horrelako gertaerak berriro gertatu ez daitezen: «kontzientziak piztu eta beldurra desagerrarazteko erantzukizuna daukagu», nabarmendu du.
Eta gaineratu du: «borrokatu dezagun emakumeenganako biktimizazio bikoitzaren aurka. Fokua erasotzailearen gainean jarri behar da. Erantzukizunik gabeko erasorik ez».