Udara berezi honetako nobedadea ziren, Abuztuko Udaleku Irekiak, Dobera Euskara Elkarteak antolatuta. Baina azkenean, ez dute horietaz gozatzerik izango, gaztetxoek: bertan behera uztea erabaki dute, Eusko Jaurlaritzak emandako aginduari jarraituz.
«Izugarrizko pena ematen digu, bigarren aldiz albiste hau eman behar izateak; zoritxarrez, badakigulako zein diren egoera honetan kaltetuenak, gure txikiak eta gazteak», azaldu dute Doberatik. Izan ere, Udaleku Ibiltariak bertan behera utzi ondoren, Abuztuko Udaleku Irekiak antolatu zituen Doberak, baina horiek ere ezin izango dituzte egin, azkenean: «bagenekien aukera bazegoela bertan behera utzi behar izateko, Koronabirusaren pandemiagatik bete beharreko neurriengatik. Eta lanean ari ginen baldintza guztiak betetzeko, udalekuak antolatzerakoan. Baina azkenean, ez da posible izan».
Eskerrak, izena eman dutenei eta lankidetzan aritutakoei
Izena eman zutenei, dirua bueltatuko die Doberak, eta egun hauetan jarriko dira haiekin harremanetan, posta elektronikoz, datuak eskatu eta izenematearen zenbatekoa bueltatzeko.
«Eskerrak ematea besterik ez zaigu geratzen. Eskerrik asko, beste behin guregan konfiantza erakutsi duzuen guztioi; izena eman duzuenoi, eta lankidetzarako prest azaldu zareten Hernaniko elkarteoi. Espero dugu elkar ikusiko dugula, datorren udan, edo ikasturtean zehar», nabarmendu du Doberak.