stelehenean argitaratu zuen Hernaniko Udalak, Gipuzkoako Aldizkari Ofizialean, kultur jardueretarako dirulaguntzen deialdia. Beraz, dagoeneko zabalik dago epea, eskaerak aurkezteko. Hilabeteko epea izango da horretarako, abuztuaren 19ra arte.
Deialdiak arautzen du, «entitateei lehiaketa bidezko dirulaguntzak emateko modua, kultur sustapen eta zabalkunde arloan urteko programak edo jarduera zehatzak garatzeko eta egiteko». Hortaz, Hernaniko Udaleko Kultura Sailari dagokio dirulaguntza horiek kudeatzea.
Eskaerak, internet bidez edo Herritarren Harrera Zerbitzuan
Bi modu daude eskaerak aurkezteko: telematikoki egin daiteke, www.hernani.eus web orriaren bitartez; edo aurrez aurre, udaletxeko Herritarren Harrera Zerbitzuan, beheko solairuan.
HHZn egiteko, astelehenetik ostiralera izango da aukera, goizeko 09:00etatik 13:00etara; baina horretarako, hitzordua hartu behar da aldez aurretik, telefonoz: 943 33 70 00.
Eskatzaileek, honakoak aurkeztu beharko dituzte, besteak beste: eskaera orria; bestelako erakunde, organismo eta abarri egindako dirulaguntza eskaeren eta jasotakoen aitorpena; Eusko Jaurlaritzako Elkarte eta Erakundeen Erregistroan izena emanda dagoela egiaztatzen duen ziurtagiri eguneratua; zerga bidezko betebeharrak, Gizarte Segurantzarekikoak eta BEZ araubidea egunean edukitzearen aitorpena; dirulaguntzaren xede izango den jardueraren deskribapena; gastu eta sarreren aurrekontu orekatua; eta Identifikazio Fiskaleko Kodearen dokumentuaren fotokopia.
Dirulaguntzak eskatu ditzakete egoitza Hernanin duten entitate pribatuek, edo salbuespen gisa, bere jardueraren zati haundi bat herrian garatzen badute.
Irabazi asmorik gabeko entitate juridiko pribatuek jaso ahal izango dituzte dirulaguntzak, betiere helbide soziala Hernanin badaukate. Salbuespen bezala, Hernanitik kanpoko entitateek ere jaso ditzakete, bere jardueraren zati haundi bat herrian bertan garatzen badute, edo Hernanirentzat interesgarria bada.
Jasotako dirulaguntza ezingo da izan jardueraren gastua baino haundiagoa, ez bere horretan, eta ezta beste administrazio publiko batetik jasotako dirulaguntza gehituta ere. Kultura Batzordeak ebatziko ditu dirulaguntza eskaerak, eta horren berri emango die eskatzaileei. Dirulaguntza jasoko dutenen kasuan, zehaztuko diete esleitu zaien kopurua, ordainketa modua, justifikazioak egiteko modua, eta beste hainbat baldintza eta betebehar.
Informazio gehiago, HHZn edo www.hernani.eus/eu/dirulaguntzak web orrian.