Etzi emango diote segida, Uda Hernanin 2020 programazioari; eta oraingoan, Ainhoa Larrañaga abeslari hernaniarra izango da protagonista. Atsegindegiko taula gainera igoko da, arratsaldeko 20:00etan, eta Eskuminak bere disko berria aurkeztuko du, lau musikariren laguntzaz: Haritz Lauroba bateriarekin, Iker Lauroba baxua eta kontrabaxuarekin, Amaia Miranda gitarrajotzen, eta Garazi Esnaola pianoarekin. Larunbat honetan zen izatekoa, hasiera batean; baina egun bat aurreratu dute.
Kontzertua doakoa izango da, baina bertan egoteko, beharrezkoa da gonbidapena hartzea, aldez aurretik. Biterin daude eskuragarri, goizeko ordutegian, 09:00etatik 12:00etara.
Zita bikoitza Chillida Lekun, asteburu honetan
Ainhoa Larrañagaren kontzertua ez da izango aste honetako saio bakarra, udako programazioaren barruan. Izan ere, zita bikoitza jarri dute astebururako, Chillida Lekun. Hasteko, larunbatean, goizeko 11:00etan hasita, Eskulturak betetzea dantza tailerra eskainiko du Myriam Perez Cazabon dantzariak, 6 eta 12 urte bitarteko haurrei eta haien familiei zuzenduta. Eta igandean, eguerdiko 12:00etan, txotxongilo emanaldia izango da, 5 urtetik gorako haurrentzat eta familientzat: Trashhhh!
Elkarlanean antolatu dituzte saio horiek, Hernaniko Udalak eta Chillida Lekuk; eta bietarako sarrerak, eskuragarri daude Biteri kultur etxean, 09:00etatik 12:00etara baita ere. 6 eurokoa da prezioa, bi kasuetan.