hi baino beranduago, baina aurten ere ez du hutsik egingo Laburbirak, Hernanin. Izan ere, Dobera Euskara Elkarteak antolatuta, gaur izango da Biterin, arratsaldeko 18:30etan hasita, Euskerazko film laburren XVII. zirkuitua. Maiatzaren 25erako zegoen antolatuta Laburbira, baina osasun alarmaren eraginez atzeratu, eta gaur egingo da.
Bederatzi film labur, eta solasaldia
Bederatzi film labur eskainiko dituzte, eta solasaldia ere antolatu du Doberak, film horietako baten zuzendariarekin: Beñat Iturrioz hernaniarrarekin, hain justu. Gau beltza film laburra da berak zuzendutakoa, eta gaurkoan pelikula hau ere egongo da ikusgai, Laburbiran.
Honakoak dira, gaur arratsaldean jarriko dituzten beste zortzi filmak eta horien egileak: Urak dakarrena (Marilin Taldea), Anti (Josu Martinez), Tigre bat (Amaia San Sebastian), Pil pil (Kristina Zorita), Mamarro (Ibon Iza Totorika), Kateak (Yolanda Mazkiaran), Jauzi bat eta prixt (Maitane Eyheramonho), eta Harria herria (Dimegaz Kultur Elkartea).
Doberak jakinarazi du, bi helburu nagusi dituela Laburbirak: «alde batetik, euskerazko sortzaileen lana ezagutaraztea, euskeraz ekoizten jarraitu dezaten aukera zabalduz; eta bestetik, ikusleak hemen eta euskeraz sortutako lan hauekin gozaraztea».