Iurretako liburutegiak bertako udalarekin batera, urtero antolatzen duen literatura lehiaketaren barruan, bertsopaperaren atalean Iñigo Legorburu nagusitu da Epaile epaitua bertso sortarekin. Xabier Amurizaren Trumoia ortzi beltzean hoska doinu «bihurrian» abesteko idatzi zuen hernaniarrak, eta sei puntuko zortzi bertsoz osatu zuen lehiaketan garaipena eman dion lana.
Bertsolaritza txapelketetan epaimahaikide lanak egiten dituzten epaileen jardunak eta burutapenak kontatzen ditu Legorburuk, egilea bera bertso-epaile jarduten delako, baita ere. Hernaniarraren esanetan, «bertso-munduan epaileen gaia batzuetan nahiko tabua suertatzen da eta uste dut, badela garaia gaia naturaltasunez tratatzeko; bertsozaleak garelako ezer baino lehen, gure bertute eta itzal guztiekin».
Horrela, bere azalean bizitako esperientziak kontatu ditu Legorburuk Epaile Epaitua izeneko bertso sortan: «Barruan ahots kritiko bat hor nola daukagun gordea, iristean tenorea, epai-mahaikide batzuk dira eta, epaile denok, ordea», dio bertsotako batean.
Ironia eta zorroztasunagatik eraman du saria
«Puntu horrengatik saritzea erabaki dugu», adierazi zuten Bizkaiko Bertsozale Elkarteko kideek. Hauek aritu ziren aurkeztutako bertso sorta guztiak epaitzen, eta guztietatik onena Legorbururena dela erabaki zuten.
Baina ez da lehenengo aldia Legorburuk saria jasotzen duena. Literatura genero ezberdinetan saritua izan da askotan, egindako «lan finagatik». Joan den urteko abenduan bost saritan gailendu zen eta ordurako, bere ibilbideak 80tik gora irabazi zituen. Poesia, bertsoak, idazlanak… asko dira Legorburuk biltzen dituen modalitateak.
Liburu batean argitaratu dira bere bertsoak
Garaile irten den Legorbururen bertso sorta liburu batean argitaratu da. Iurretako liburutegiak udalarekin elkarlanean argitaratzen duen liburuan ikusi du bere lana paperean.
Komiki, prosa edo poesiako heldu zein aurren beste lan sarituekin batera argitaratu da Epaile epaitua bertso sorta. Felix Maraña kazetari eta idazleak sortutako liburuan argitaratu dira zortzi bertsoak, Berminghan bere argitaletxearen bidez. Gainera, liburuaren ale bat jada liburutegi publikoak dago, “nahi duenak irakurri dezan, denen eskuragarri”.