Ohi baino beranduago, baina aurten ere ez du hutsik egingo Laburbirak, Hernanin. Dobera Euskara Elkarteak antolatuta, ostegun honetan izango da Biterin, arratsaldeko 18:30etan hasita, Euskerazko film laburren XVII. zirkuitua. Hasiera batean, martxoaren 25ean egitekoa zen, baina atzeratu egin zen, Koronabirusaren eraginez.
Bederatzi film labur eskainiko dituzte, eta solasaldia ere antolatu du Doberak, film horietako baten zuzendariarekin: Beñat Iturriotz hernaniarrarekin, hain justu. Gau beltza film laburra da berak zuzendutakoa, eta etzidamu ikusgai egongo dena, Laburbiran.
Honakoak dira, jarriko dituzten beste zortzi filmak eta horien egileak: Urak dakarrena (Marilin Taldea), Anti (Josu Martinez), Tigre bat (Amaia San Sebastian), Pil pil (Kristina Zorita), Mamarro (Ibon Iza Totorika), Kateak (Yolanda Mazkiaran), Jauzi bat eta prixt (Maitane Eyheramonho), eta Harria herria (Dimegaz Kultur Elkartea).
2018 eta 2020 urteen artean egindakoak dira, «sortzaile gazteenak gehienak, eta esperientzia luzeko zuzendarienak beste batzuk», azaldu dute. Guztira, ordubeteko «koktela» osatu dute ostegunerako, «kalitatezkoa eta dibertigarria, euskerazko film laburren zaleei merezi duten gozatua emateko».
Doberak gogorarazi du, bi helburu dituela, Euskaltzaleen Topagunearekin batera antolatzen duen saioak: «euskerazko sortzaileen lana ezagutaraztea, euskeraz ekoizten jarraitu dezaten aukera zabalduz; eta ikusleak hemen eta euskeraz sortutako lan hauekin gozaraztea».