Abuztuko hilabetean ondo pasa eta entretenitzeko aukera eskainiko du Doberak. Aurten, lehenengoz, udaleku irekiak antolatu ditu abuztuko 4 asteetarako. Nahi diren asteak aukeratzeko aukera dago, asteak «independienteak» direlako. Lehen Hezkuntzako ikasleentzat (2008-2013 artean jaiotakoak) eta DBH lehenengo eta bigarren mailako gazteentzat (2006-2007 artean jaiotakoak) prestatu dira udalekuak. Azken hauentzat, ordea, bigarren eta hirugarren asteak gordeko dira, bakarrik.
Astelehenetik ostiralera, ekintza bereziekin
Udalekuen ordutegiari dagokionean, gazteak goizeko 09:00etan elkartuko dira taldeetan eta 13:30ak arte arituko dira. Gainera, astean behin «egun pasa» bat egingo da, arratsaldeko 18:00ak arte.
Lehenengo astetik hasita azkenekora arte plangintza «berezia» egin dute. Ohiko aisialdi ekintzez gain, asmoa da herriko elkarte ezberdinekin harremanetan jartzea antzerkia, euskal dantza edota bertsolaritza ezagutarazteko. Kirola egiteko aukera ere izango dute umeek, Kaxkardi Kirol Elkartearekin ekintzak egingo dituztelako asteko egunen batean.
«Herriko elkarteekin elkarlana egin nahi genuen, euskal kulturari eta herrian dauden elkarteei ere bultzada emanaz». Horregatik, Ttarla, Bertso Eskola, Amher, Antzerki taldea edota Kaxkardi Kirol Elkartea protagonistak izango dira Doberak antolatu dituen udaleku irekietan.
Udaleku «berritzaileak eta ezberdinak izatea nahi dugu»
Udalekuen helburu nagusia da «opor garaian, euskarazko aisialdiaz gozatzea eta euskeraren erabilera areagotu eta sendotzea». Euskara Elkartea den aldetik, euskal kultura eta horrekin batera, hizkuntza bultzatzea da udalekuekin lortu nahi den beste jomugetako bat.
Bestalde, haurren eta gazteen arteko sareak ere euskaldundu nahi dituzte, modu ez formalean. «Hori garrantzitsua da eta iruditzen zaigu udaleku hauek hori betetzen dutela», jakinarazi dute.
Izan ere, aurtengo larrialdi egoerak haurrak gelatik lehenago ateratzea behartu zituen eta askok «euskeraz harremantzeko aukera galdu dute». Horregatik, udaleku hauek egitea aberasgarria izan daitekeela pentsatu dute antolatzaileek.
Aipatutakoez gain, abuztuko plangintza honen beste helburu nagusietako bat da, «euskal kulturara eta natur-ondarera gerturatzea eta hauek ezagutaraztea».
Lehenengo aldia da Doberak udaleku irekiak antolatzen dituela. Orain arte udaleku itxiak egin izan dituzte, baina aurten ezinezkoa izan da osasun larrialdi egoeragatik. Bi txanda izaten ziren, uztailean eta abuztuan eta Euskal Herriko herrietatik barrena abenturaz jositako esperientzia izaten zen.
Izen ematea bihartik uztailaren 24ra, webgunean
Lau astetan egongo da izena emateko aukera, «independienteki eta tartekatuta ere, bakoitzaren nahia edota beharraren arabera». Hala ere, DBHkoek bigarren eta hirugarren astea bakarrik izango dute aukeratzeko. Plazak mugatuak dira eta taldeak 15 lagunez osatuko dira gehienez, 13 haur eta 2 begiralerekin.
Izena emateko aukera online izango da: www.dobera.eus webgunean. Hala ere, edozein zalantzarako edota informazioa lortzeko honako hauetara jo daiteke: 943332799 telefono zenbakira edo email helbidera, dobera@dobera.eus.
Garrantzitsua da gogoratzea, Abuztuko Udaleku Irekietan koronabirusagatik ezarritako segurtasun neurriak beteko direla. «Protokolo bat dago zehaztuta», diote. Horretarako, begiraleekin formakuntza bat egingo da. Gurasoekin ere bilera prestatuko dute, plangintzaren inguruan informazioa emateko eta osasun baldintzak betetzeko protokoloa zein izango den azaltzeko.
Lan poltsa, uztailaren 22ra arte
Begiraleak behar dira udalekuetan. Interesdunek curriculuma dobera@dobera.eus-era bidali dezakete. Eskatutako baldintzen artean daude adin nagusikoa izatea eta Aisialdiko Begirale titulua edo hezkuntzarekin erlazioa duten ikasketak izatea.