Duela bi aste pasatxo, ekainaren 20an, ireki zituen ateak berriro Chillida Leku museoak, dantza emanaldi berezi eta guzti, Myriam Pérezen eta Nagore Legarretaren eskutik, udarako solstizioa ospatzeko. Eta orain, udaran, ez du etenik izango Chillida Lekuko jardunak: egitarau berezia prestatu dute, uztailerako eta abuzturako, makina bat emanaldi eta ekintzarekin. Horien artean daude, Izaro Andres abeslariak eskainiko duen kontzertua, hilaren 30ean; eta Zero en Conducta konpainiaren Trashhhhh! antzezlana, 26an.
Ekintza ezberdinen bitartez, Chillida Lekuk bilduko ditu natura, zinea, musika, dantza, yoga eta gastronomia. Asmoa da, «bertako jendeari udaraz beste modu batera gozatzeko aukera ugari eskaintzea».
Yoga klaseak, ilunabarrak, gaueko bisitak, zine gauak...
Astero egingo dituzte, ekintza horietako batzuk. Ostiraletan, hasteko, gaueko bisita eta afaria egin ahal izango da, 19:00etan hasita. «Museoa gauez irekiko dugu, aparteko esperientzia eskaintzeko», azaldu dute. Eta ondoren, afaria eskainiko diete, Lurra Caféko terrazan.
Larunbatetan, berriz, zita bikoitza izango da. Goizetan, hasteko, yoga saioak egingo dituzte, eskulturen artean. Ordubetekoak izango dira saioak, 09:00etan hasita, eta ondoren, brunch edo gosaria egingo dute Lurra Cafén. Gainera, egun osorako sarrera librea izango dute gero, partehartzaileek.
Eta larunbat arratsaldetan, Kutxa Kultur Ilunabarrak antolatu dituzte, 19:00etan. «Artea, musika eta gastronomia batuko dira, esperientzia sentsoriala eskaintzeko», azaldu dute. Horrela, 19:00etatik aurrera museoa bisitatu, eta 20:30etan kontzertu batez gozatuko dute bertaratuek. Eta ondoren, afaria izango dute Lurra Cafén.
Zine gauak ere egingo dituzte Chillida Lekun, uztailaren 16, 17, 18 eta 19an. A Contracorriente Films zine-ekoizlearekin elkarlanean, estreinatu berri diren lau film eskainiko dituzte, aire librean. Arratsaldeko 19:00etan irekiko dituzte ateak, museoa bisitatzeko; eta 22:00etan hasiko dira pelikulak.
Izaroren kontzertua, uztailaren 30ean
Hilaren bukaeran izango da Chillida Lekuko emanaldi berezienetako bat. Kontzertua eskainiko du Izaro Andres abeslariak, museoko zelaian, hilaren 30ean. 20:30etan hasiko da kontzertua, baina 19:00etan sartu ahal izango dute bisitariek, museoa bisitatzeko. Izarok udaran eskainiko dituen sei kontzertu berezietako bat izango da Chillida Lekukoa.
Beste emanaldi berezi bat, Zero en Conducta antzerki konpainiak eskainiko du museoan: Trashhhhh! txotxongilo-ikuskizuna, uztailaren 26an. Espainia, Alemania, Italia eta Herberehetan hainbat emanaldi eskainita, Bartzelonako Mercé jaietarako aukeratu zuten ikuskizuna, eta kaleko ikuskizun onenaren saria jaso zuen Haifako Nazioarteko Jaialdian, Israelen. Eguerdiko 12:00etan hasiko da emanaldia, Chillida Lekun.
Izpigramen tailerra eta dantza tailerra, bi hilabeteetan
Bi tailer ere egingo dituzte udaran. Batetik, izpigramen tailerra eskainiko du Nagore Legarreta argazkilari hernaniarrak, uztailaren 18an eta abuztuaren 22an. Goizeko 11:00etan hasita, familia tailerrak dira, 6-12 urteko haurrei zuzenduta, eta eskulturetan argiaren presentziaz jabetzea izango du helburu, teknika primitiboak eta analogikoak erabilita horretarako.
Eta bestetik, dantza tailerra eskainiko du Myriam Pérezek, uztailaren 25ean eta abuztuaren 29an. Familientzako tailerra izango da, 6-12 urtekoei zuzenduta hori ere. Eta 11:00etan hasita, asmoa izango da Chillidaren eskulturak gorputzarekin sentitu eta berak sortutako espazioak betetzea.
Eta azkenik, abuztuaren 12tik 13rako gauean, izarren behaketa egingo dute, Pertseidak ikusteko, Aranzadiko adituen eskutik. 23:00etatik 03:00etara izango da hori, baina 19:00etan irekiko dute museoa, bisitarako.
Sarrerak, interneten salgai
Jarduera guztietarako sarrerak, internet bidez eskuratu daitezke, museochillidaleku.com web orrian; eta bertan dago guztiei buruzko informazio gehiago ere.
Uztailaren 25eko dantza tailerrerako, eta abuztuaren 22ko izpigramen tailerrerako, Hernaniko udaletxean salduko dituzte sarrera guztiak.