Kultur ekintzez betea dator, Hernaniko Udalak antolatutako Udako kultur programazioa

Bizi izan dugun egoerak hamaika ekitaldi ezabatu ditu egutegietatik. Hala ere, Hernanin kulturaz gozatzeko aukerak aurrera jarraitu du, izan ere, maiatza eta ekaina bitartean, etxeetatik ere «kulturaz gozatzeko aukera izan dute» herritarrek, kultura online eskaini baitu Udalak. Honen emaitza «oso positiboa» izan dela ere jakinarazi du. Jarraian, Kulturaz gozatu, elkar zaindu egitasmoa ere sortu zuten, «San Joanetan zerbait sinbolikoa egiteko asmotan». Eta oraingoan, kultur ekintza berezi bezain egokituak prestatu dituzte, uztaila eta abuztuan izango direnak. Udako kultur programazio honi, asteburu honetan eman zaio hasiera, Zinea kalean ekintzarekin.
Uda Hernanin programazioaren baitako ekintza hauek «familia, lagun eta inguruko jendearekin gozatzeko aproposak dira».  Oraingoz, Atsegindegin egingo direla azaldu du Udalak, hala ere, «egoeraren arabera, lekua aldatu daiteke». Kultur ekintza hauetara bertaratzeko, aurrez gonbidapenak hartu behar dira, Biterin. Doakoak dira, eta astero jarriko dituzte sarrerak eskuragai, goizeko 09:00etatik eguerdiko 14:00etara. Hernaniar artista asko izango dira Uda Hernanin programazioan parte hartu dutenak, hala nola, Hernaniko Musika Banda, Ainhoa Larrañaga... 
Egoerak behartuta gainera, neurri guztiak hartuko dira kontutan, besteak beste, eserlekuak distantzia batekin jarriko dira, ekitaldietara sartu eta ateratzeko maskarila erabili behar da, «behin eserita egotean, kendu daiteke noski». 200 pertsonako aforoa ezarri dute muga gisa, beraz, aurrez gonbidapenak hartzea eskatu dute, «guk ere kontrol bat eramateko». 
Zenbait kultur ekintza, duela hilabete batzuk egitekoak ziren, «baina pandemiak eraginda, pendiente geratu ziren», eta uda honetako programaziora ekarri dituzte, esaterako, Maria Berasarte, Tonbola antzerkia, eta Basoa dantza emanaldia. 

Orain arte antolatutakoak, «oso emaitza onak»
Aipatu moduan, pandemiak Hernaniko kulturan izan du eragina, baina Hernaniko Udala kultur sailarekin batera buru-belarri aritu da, «herritarrek kulturaz gozatzen jarraitu dezaten». Horretarako, haisera batean, online programazioa eskaini zuen, eta «oso emaitza positiboak izan ditugu. Kulturaz gozatu, elkar zaindu egitasmoan, txupinazioa Steaming bidez eman genuen, eta jende mordoak ikusi zuen». 
Hernaniarren ardura ere goraipatu dute, «oso arduratsuak izan dira herritarrak, pena haundia genuen San Joan jaiak bere horretan egingo ez zirelako, baina herriaren erantzuna oso ona izan da». Auzoetan ere egon da mugimendua, eta «Auzo Elkarteei eman nahi dizkiegu eskerrak, emandako laguntza eta inplikazioagatik». Orokorrean, oso eskertuta daudela jakinarazi dute.