Plazan elkartzen ziren astelehenero, erretiratuak eta pentsiodunak, beraien eskubideak aldarrikatu eta pentsio eta bizitza duin bat izatea eskatzeko. Koronabirusagatik alarma egoera ezarri baino lehen izan zen hori, baina eten egin zituzten deialdiak, martxoan.
Hiru hilabete hauetan, ordea, ez dute galdu grina, aldarrikapenekin jarraitzeko. Eta horregatik, elkarretaratzea deitu dute datorren astelehenean, Plazan bertan, udaletxeko arkupeetan. Eguerdiko 12:00etan egingo dute bilera.
Beharrezko neurriak hartuta, hurrengo pausoak mahai gainean jartzeko ordua
Elkarretaratzea egiteko, hori bai, beharrezko segurtasun neurri guztiak hartuko dituzte, aurreratu dutenez. Guzti horiekin, bat egiteko deia luzatu diete, «adinekoen, pentsioen eta zaharren egoitzen egoerarekin kezkatuta» dauden guztiei, eta egoera horrek eragiten dienei. «Erretiratuek eta pentsiodunek ahotsa eta botoa ditugu», nabarmendu dute deialdian.
Landuko dituzten gaien artean daude, besteak beste, honakoak: pentsio publiko eta duinak defendatzea, «orain eta betirako»; osasun publiko eta kalitateazkoaren alde egitea; nahi gabeko bakardadeari konponbidea bilatzea; eta pobreziaren aurka egin eta RGI duina eskatzea.