Egoera desberdinak ekarri ditu osasun alarma egoerak, Koronabirusaren ondorioz ezarri zutenetik; batzuk zailak, beste batzuk bereziak, arraroak... Baina politak ere bai, zenbait. Eta ohitura berriak hartzeko ere balio izan du, kasu askotan.
Horietako bat da Inmakuladako ikasleak eta Kronika eskutik eraman dituena, konfinamendu osoan zehar. «Berehala txertatu genuen ikasketa errutinan, eta egunero-egunero, egunari hasiera emateko, Kronika irakurri dute etxean, eta ondoren komentatu», azaldu du Itziar Oterminek, Lehen Hezkuntzako 6garren mailako taldearen tutoreak; Euskara eta Literatura ere ematen die berak.
«Beti iruditu zait interesgarria, ikasleek Kronika irakurtzea, eta gelan landu izan dugu tarteka. Konfinamendua hasi zenetik, online egiteko moldatu ditugu gure klaseak guztiz, eta lanak modu digitalean egin dituzte ikasleek, baita guk zuzendu ere», azaldu du. LH6ko gela horretan, zehazki, Googleren aplikazioak erabili dituzte ikasleek: Classroom, etxeko lanak bidali eta online zuzentzeko; Drive, koaderno digital modura; Hangouts, momentuko zalantzak argitzeko; Meet, bideo-deiak egiteko; Gmail, guraso eta ikasleekin modu formalean komunikatzeko... «Lehendik ere erabiltzen genituen zenbaitetan, eta nahiko erraz egokitu gara dinamikara».
Eguneroko dinamika horretan txertatu dute Kronika ere. Egunero, Kronika digitalera sarbidea bidali die tutoreak, Hangouts bidez, 23 ikasleei: Mikel B., Silvana, Moises, Casandra, Soufian, Galy, Ane H., Irati, Mikel H., Alain, June, Dey, Eunate, Noa, Manex, Aitana, Anetxu, Jaione, Christian, Loendy, Ethan, Izadi eta David. «Bakoitzak bere etxean irakurri du Kronika, eta ondoren, atentzioa gehien eman dion albistea aukeratu, eta idatzizko komentario txiki bat egin dute. Askotan, albistearekin batera zegoen argazkia ere berbidali dute, interesgarria edo polita iruditu zaielako».
«Hasieran, Koronabirusari buruzko hainbeste albisteren artean, eguraldia aukeratzen zuten gustukoena!»
Albisteen aukeraketa horren inguruan, anekdota bat ere kontatu du Itziar Oterminek: «konfinamendu hasieran, albiste guztiak Koronabirusari buruzkoak zirenean, ikasleak desanimatu egiten ziren. Itziar, dena Koronabirusari buruzkoa da; desanimatu egiten gara albiste txarrekin!, esaten zidaten. Eta orduan, askok eguraldia aukeratzen zuten gustukoena. Oso eguraldi ona egin baitu konfinamenduan!», kontatu du irakasleak.
«Baina Koronabirusak albisteen monopolioa galdu duen heinean, albiste aukeraketa zabalagoa izan dute, eta egia esan, ia albiste guztiak komentatu dituzte», dio.
«Etxeko lan bezala eskatu gabe, asteburuetan ere Kronika irakurtzen dute askok»
Itziar Oterminek nabarmendu du, era berean, Kronika irakurtzeko ohitura hartu dutela ikasle horietako askok: «hasieran etxeko lan modura hasi zen jarduera hau, askok bere egunerokotasunean txertatu dute; eta asteburuetan ere, Kronika irakurtzen dutela esan didate, nahiz eta nik ez eskatu etxeko lan bezala».
Ohitura hori hartu izana, ikasleentzat «oso positiboa» dela uste du Oterminek: «oso baliagarria izango da, beraien egunerokotasunean», adierazi du.
Gaurkoa, ikasturte bereziko azkeneko klase eguna
Irailetik martxora bitartean ohiko ibilbidea egin zuen ikastetxe guztietan, Inmakuladan bezala, 2019-2020 ikasturteak. Baina COVID-19 birusaren agerpenak, eta hari aurre egiteko alarma egoerak, hankaz gora jarri zizkieten ikasketa planak, denei. Telematikoki aritu dira lanean ordutik, eta luzaroan ahaztuko ez duten ikasturtea bizitu dute azkenean, berezia bezain arraroa guztientzat.
Gaurkoa izango du azkeneko klase eguna, aurtengo ikasturteak, Inmakuladako ikasleentzat. Eta gaurkoan irakurriko dute Kronika azkeneko aldiz, klaseko ariketa bezala, datorren ikasturtera arte. Udarako oporraldiaz gozatzeko tartea izango dute orain, irailera bitarte; eta egoera alaiago horietan ere, haien eskutik joan nahi luke Kronikak, eguneroko bidelagun izateko. Beraz, Inmakuladako ikasleei ez ezik, Urumea bailarako guztiak gonbidatu nahi ditu, egunerokotasunean Kronika irakurri eta komentatzera.
Eta kontatzeko zerbait daukazuenean, zergatik ez jo guregana? Edozertarako izango dituzue Kronikako ateak zabalik!