Eten egin zuen Hernaniko Musika Bandaren egunerokoa, martxoan, COVID-19aren aurrean ezarritako osasun alarma egoerak: ez entsaio eta ez kontzertu. Baina ez dira geldirik egon ordutik, eta beste hainbatek bezala, sare sozialen bitartez saiatu dira iristen herritarrengana, Musika Bandakoak ere. Horrela, esaterako, «hernaniarrontzat hain kuttuna den Mendirik mendi doinua» zabaldu zuten bideo bidez, martxoaren 18an, konfinamendua hasi eta gutxira. Bertan, Jon Ansorena, Iñaki Eguren eta Haritz Ezeiza txistularien laguntza izan zuten Musika Bandako kideek. Bigarren bideo bat ere zabaldu zuten apirilaren 11n, Ainara Ortega abeslariaren laguntzaz, Maitia nun zira abestiaren zati bat grabatuta. «Bi bideo horiek arrakasta haundia izan zuten, eta asko zabaldu ziren jendartean. Baina musikariak eta entzuleak zuzenekoaren zain zeuden, horretara baitaude ohituta herriko bandak», azaldu dute.
Kaleko aurreneko emanaldia, auzoz auzoko Preludioa
Joan den ostegunean ekin zien berriro entsaioei, Musika Bandak, horiek egokituta beharrezko segurtasun neurriak bermatzera. «Bi txandatan egin ditugu entsaioak: perkusioa eta haize-metala batetik, eta haize- -egurrezko tresnak bestetik. Laburragoak izan dira entsaioak, baina modu presentzialean elkartzen garen aurreneko aldia denez, etekin haundia atera genion elkarrekin jotzeari». Aurreneko entsaioetatik, aurreneko emanaldietara egingo dute orain. Eta estreinakoa, oso berezia izango da: etzi, larunbatarekin, San Joanetako Preludioa eskainiko dute auzoz auzo eta plazaz plaza. Arratsaldeko 19:00etan hasita, joko dute Plazan, Plaza Berrin, Zinkoenean, Oblatosen, Karabelen, Zikuñagan, Portun eta Elizatxon. «Toki bakoitzean geldirik joko dugu. Izan ere, kalejiran joanda zaila da gutxieneko distantziak mantentzea, musikarien artean». Kontzertu txiki horietan, estilo ezberdinetako doinuak joko dituzte: Deba, Irureta eta Praskuarena kalejirak, eta kontzertuko zenbait piezaren zatiak; Santana a Portrait, Deep Purpleren Smoke on the water, eta Bizeten L'arlesienne, hain justu.
Kalejira eta kontzertuak, San Joanetako egunetan ere
Preludioak ez ditu San Joanak bere horretan iragarriko, aurten ez baitira ohiko San Joan jaiak izango, ekintza batzuk antolatuko diren arren. Baina jaiei dagozkien egunetan ere, kalera aterako da Musika Banda, eta kalejira zein kontzertuak eskainiko ditu, herrian barrena. Horrela, ekainaren 23an, San Joan Zortzikoa joko du, arratsaldeko 20:00etatik aurrera, herriko hainbat txokotan: Plazan eta Plaza Berrin, Zinkoenean, Txirrita kalean, Atsegindegin, Txantxillan eta Lizeagan. Eta ekainaren 24an, saio bikoitza egingo dute. Aurrena, goizeko 09:00etan, diana joko dute Etxeberrin, Sagastialden, Antziolan, atletismo pistaren inguruetan eta Karmelo Labakan. Eta ondoren, kontzertua eskainiko dute, eguerdiko 12:30etatik aurrera, beste lau gune ezberdinetan: Sorgintxulo auzoan, Latsunben, Urbieta kalean, eta Biteri kultur etxean. «Preludioa bezala, tokian geldirik joko dugu horietan ere. Ohiko ibilbidea aldatu dugu, Musika Bandaren doinuak ahalik eta auzo eta herritar gehienengana iritsi daitezen», diote. Festarik izango ez den egunetan, etxez etxe gogoraraziko dute, San Joanen egunak direla.
HERNANIKO MUSIKA BANDAREN EMANALDIAK EKAINAK
13 PRELUDIOA
19:00, Plazan, Plaza Berrin eta Zinkoenean
19:25, Oblatosen
19:50, Karabel auzoan
0:25, Zikuñaga auzoan
21:00, Portu auzoan
21:25, Elizatxon
EKAINAK 23 SAN JOAN ZORTZIKOA
20:00, Plazan eta Plaza Berrin
20:15, Zinkoenean
20:30, Txirrita kalean
20:45, Atsegindegin
21:00, Txantxilla auzoan
21:20,Lizeaga auzoan
EKAINAK 24 DIANA
09:00, Etxeberrin, Sagastialden, Antziolan, atletismo pistaren inguruetan, eta Karmelo Labakan
EKAINAK 24 KONTZERTUA
12:30, Sorgintxulo auzoan
13:00,Latsunben 1
3:30, Urbieta kalean
14:00, Biteri kultur etxean