Iheslari eta mugalarien kontuak ezagunak dira Hernanin, eta gai horri buruzko dokumental bat egin du Beñat Iturrioz herritarrak, Bira Produkzioakekin. Inguru hauetako baino, beste sare bat da dokumentalean jorratu dutena: Sans Nom Sarea. Horixe da dokumentalaren izenburua, izenik gabeko sare klandestinoa baitzen hura.
Gaur estreinatuko dute dokumentala, Ipar Euskal Herriko Kanaldude telebistan, arratsaldeko 20:00etan. Bere webgunean (kanaldude.eus) badago aukera, telebista zuzenean ikusteko. Eta datozen bi asteotan, webguneko Nahieran atalean ere egongo da ikusgai, dokumentala bera.
Maiatzaren 2tik aurrera, berriz, Bira Produkzioakek Vimeon (vimeo.com/biraprodukzioak) eta Youtuben (labur.eus/PU9xM) dituen kanaletan jarriko dute.
1942-1944 urteen artean, naziengandik ihesi zebiltzan aliatuei laguntzen
Bigarren Mundu Gerran kokatzen da dokumentala, 1942 eta 1944 urteen artean. Naziengandik ihesi zebiltzan aliatu belgikarrei eta herritar xumeei, Europa Aliatura pasatzen laguntzen zien sare klandestino bat zegoen, Behe Nafarroako Mendibe herrian hasi, eta Iratiko oihana zeharkatu, eta Nafarroako Orbaizetara iristen zena.
33 minutuko dokumentalean, jorratzen dituzte Euskal Herriko espioi sarea, erresistentzia belgikar, frantziar eta euskalduna, Bigarren Mundu Gerra, eta beste hainbat gai. Joan den urtean zehar grabatu zuten, eta zazpi lagun elkarrizketatu zituzten, euskeraz, frantsesez zein ingelesez. Azpitituluekin jarriko dute dokumentala.
Beñat Iturriozek, errealizazio eta edizio lanak egin ditu dokumentalean. Informazio gehiagorako eta trailerra ikusteko, hemen: biraprodukzioak.eus.