Internet bidezko doako motibazio saioak antolatu dituzte herriko merkatarientzat, datozen bi asteotarako, Hernaniko Udalak eta Berriak merkatari eta ostalarien elkarteak elkarlanean.
Hernaniko merkatari guztientzat izango dira, Berriak elkartekoak izan ala ez. «Ziurgabetasuna nagusi den garai hauetan, erabakiorrak dira norbere barne indarrak, eta horiek piztuta mantentzeko motibazioa», azaldu dute. Hori horrela, mahai gainean jarri dute nola mantendu piztuta «gure motorea, jarduera batzuk ezinezko ditugunean»; edota nola elikatu, hobetzeko, berrasmatzeko eta orekatzeko bideak.
Horri begira antolatu dituzte motibazio saioak online, Motibazioa barne bidea izenburupean, «trebatu, elkar lagundu eta prestatzeko».
Aran Erasunen eskutik, apirilaren 22, 24 eta 28an
Hiru egunetan eskainiko dituzte saioak, apirilaren 22an, 24an eta 28an; eta Aran Erasunek gidatuko ditu, Harago Aholkularitzako coach eta trebatzaileak.
Bi ikastaro ezberdin izango dira, egingo dituztenak. Aurreneko bi egunetan, Ahalmen eremuaren mapa izenekoa egingo dute: hilaren 22an euskeraz, 16:00etatik 18:00etara; eta 24an gaztelaniaz, ordutegi berean. Bietan, gehienez ere 10 pertsonarentzako dago tokia. Bi saio horiek daude bideratuta «egoera emozionalari lekua egin eta norbere ahalmen eremuaz jabetzera», aurreratu dutenez.
Eta hirugarren egunean, apirilaren 28an, Berrituz indartu saioa eskainiko du Erasunek, «merkatariak egoera honetan hobeto kokatzeko berrikuntzari begirako trebakuntza, elkarrekin aukera eremua hedatzeko helburuarekin». Elebiduna izango da, 16:00etatik 18:00etara, eta 20 pertsonarentzat dago tokia.
Izena emateko epea igandera arte, emailez
Hiru saioetako edozeinetan parte hartzeko, izena eman behar da aldez aurretik. Igandera arte dago epea, apirilaren 19ra arte; eta email bidez egin behar da, gurutze-a@hernani.eus helbide elektronikora idatzita.
Esan bezala, plazak mugatuak dira, hiru saioetarako.