Erabilgarri dago, joan den ostiraletik, Laiztiaga eta Sagastialde auzoak lotzen dituen aldapa berria. Joan den astean bukatu zituzten obrak, eta horien helburua izan da, «auzo hauetan ibiltzen diren oinezkoen irisgarritasuna hobetzea», Hernaniko Udalak azaldu duenez.
Izan ere, aldapa berriari esker, bide motzagoa egingo dute aurrerantzean, Laiztiagara doazen oinezkoek. Orain arte, atletismo pistatik edota haur eskolatik bertara igotzeko, eskaileretatik joan behar izaten zuten; eta mugikortasun arazoak dituztenek, edo ume karroekin dijoazenek, ibilbide luzeagoa egin behar izaten zuten. «Orain, Laiztiagarako joan-etorriak azkarragoak izango dira», ziurtatu du Udalak.
Beheko aldean bi bide dauzka aldapak, haur eskolaren alde bakoitzetik bat
Garai bateko tranbiaren pasealekutik abiatzen da aldapa, eta bi bide ezberdin ditu beheko aldean. Haur eskolaren atzealdean, alde banatatik abiatzen dira bi bide horiek, eta aldaparen erdi parean elkartzen dira, Laiztiagara batean iristeko. 2,4 metroko zabalera dauka aldapak, eta 12 metroko luzera. Obraren kostua 114.000 eurokoa izan da, baina Eusko Jaurlaritzaren dirulaguntza jaso du Hernaniko Udalak, 40.168,79 eurokoa, irisgarritasuna hobetzen duten obrei ematen zaien dirulaguntza lerroen barruan.