Galdera ikurrez betetako hilabete batzuen ondoren, lasaitasuna nabari da berriro, Goiz Eguzkin. Dagoeneko hartu du erreleboa, zuzendaritza talde berriak, joan den asteko asteartean, otsailaren 25ean. Mari Jose Lopez de Zubiria da lehendakari berria, eta ondoan izango ditu Joshean Olano lehendakariorde, Ana Rodriguez idazkari eta Angel Telleria diruzain. Haiek osatuko dute talde koordinatzailea, eta zortzi bokal ere izango dira, hamabi laguneko taldea osatzeko.
«Berrikuntza ekarri nahi dugu Goiz Eguzkira, baina egoitzaren esentzia mantenduta. Gaur egunera egokitzea da helburua, eta horretarako ideia pila bat dauzkagu, baina pixkanaka joango gara aldaketak egiten», aurreratu dute.
Oraingoz, «erritmoa ez galtzeko», segida emango diete dagoeneko martxan dauden proiektuei. «Eta behin egonkortzen garenean eta Goiz Eguzki barrutik ezagutzen dugunean, gauza berriak gehitu eta aldaketa batzuk egingo ditugu».
«Bazkide kuotak helbideratzeak asko erraztuko luke lana»
Aurreneko aldaketa batzuk, dena den, dagoeneko ari dira txertatu nahian. «Kontuak txukun eraman nahi ditugu, kontabilitatea egin, bazkide bakoitzaren fitxa osatu... Eta nahiko genuke, bazkide guztiek kuotaren ordainketa helbideratzea, prozesua errazteko. Hasi gara bazkideei esaten, eta oso ondo erantzuten ari dira. Aurreko batean, emakume talde batek irripartsu esan zigun baietz, egingo zutela; besteren batek helbideratzeko fitxa hartu, eta esan zigun fotokopiak egingo zituela, lagun guztiei emateko. Ea bazkide guztiak animatzen diren. Horrek lana erraztuko luke, denbora aurreztu, eta beste gauza batzuetarako aprobetxatu. Sekulako lana da bestela. 1200 bazkide, 10 euro ordaintzera etortzen badira...».
Nabarmendu dute, gainera, «ziur» daudela jubilatu gehiago egingo direla bazkide: «ateak zabaldu nahi dizkiogu Hernaniko gizarteari; adineko jendeari eta etorri nahi duten guztiei».
«Gure egitekoa da, adinekoak pertsona aktiboak izatea, ahalik eta denbora gehien»
Zuzendaritza berriak azpimarratu nahi izan du, Goiz Eguzki ez dela zaharren egoitza bat: «adin guztietako jubilatuak ondo pasatzera eta gustora egotera etortzeko tokia da. Badago jendea, uste duena erresidentzia bat dela, eta horregatik ez dira etortzen 63-70 urtekoak; zaharragoentzako toki bezala ikusten dute, eta pertzepzio hori aldatu behar dugu».
Horretarako, kultur eta kirol jarduera gehiago antolatu nahi dituzte: «jendea aktibo mantentzeko modukoak, fisikoki zein mentalki; eta dibertigarriak, atseginak. Gure egitekoa da, adineko pertsonak aktibo izatea eta mantentzea ahalik eta denbora gehien, eta ahalik eta beranduen izatea beharra eguneko zentro batera edo zaharren egoitza batera joateko».
Jubilatuen aktibotasunaren adibide dira, esaterako, gimnasia ikastaroak: hiru txanda daude orain, 150 pertsona guztira; eta laugarren txanda bat osatzeko adina jende badago: «osasuntsu egon behar dugu eta!».
Euskera eta informatika txertatzeko ere, asmoa
Beste bi helburu ere badauzka zuzendaritza berriak. Batetik, euskera txertatu nahi dute pixkanaka: «komunikazio guztia elebitan izango da, euskeraz eta gaztelaniaz; baina harago joan nahi dugu. Badakigu jende asko dagoela kanpotik etorritakoa, eta orain ez du ikasiko euskeraz; baina pixkanaka txertatu behar dugu euskera. Garai batean izan ziren oinarrizko euskera ikastaroak, adibidez».
Eta txertatu nahi duten bestea, informatika da: «batzuentzat pauso haundiegia izango da, baina noizbait hasi behar dugu. KZgunekoekin hitz egin dugu, eta komentatu dugu oso ondo legokeela, bazkideak animatzea bertara joatea. Modu positiboan helarazi behar zaie. Esaten badiezu WhatsAppean talde bat izan dezaketela beraien bilobekin, adibidez, sekulako poza hartuko dute. Horrela aurkeztu behar dugu. Edo Goiz Eguzkin lagunekin kafea hartzeko elkartzeko, WhatsApparen bitartez geratu daitezkeela erraz; edo posta elektronikoa erabili. Eta erabiltzen hasten badira, guri asko erraztuko digu komunikazioa. Jendeak askotan ez du jakiten, hemen zer antolatzen eta egiten den. Erakarri behar ditugu Goiz Eguzkira, eta horretarako oso tresna egokia dira horiek», azaldu dute.
«Jendearen harrera sekulakoa izan da; ilusioa egin die, bereziki emakumezkoei»
Laukotea oso pozik dago, bazkideen erantzunarekin: «jendearen harrera sekulakoa izan da. Lehendakaria emakumea izateak sekulako ilusioa egin die, bereziki emakumeei. Beldur pixka bat ere sartzen zaizu, ilusio horri erantzuteko gai izango ote zaren. Jendea aldaketaren zain zegoen. Gainera, badakite zuzendaritzan jende berria sartzen denean, lanerako gogotsu sartzen dela. Oso ondo hartu gaituzte; ondoegi, beharbada... Batzuek esan digute, zuek primeran egingo duzue. Eta erantzukizuna da hori».
Horregatik, batzarrean esan zieten bazkideei, «beraien laguntza beharko dugula eta eskertuko dugula. Eta aldez aurretik eskatu genien barkamena, gaizki egin dezakegunagatik. Izan ere, normala da hasieran gauza batzuk ez egitea nahi bezain ondo. Baina laguntza izango dugu; aurreko urteotan kolaboratzen aritu den taldea, jarraitzeko prest azaldu da», eskertu dute.
Udalaren eta Ongintzaren aldetik ere, laguntzeko prest azaldu direla nabarmendu dute: «babestuta sentitu gara. Guztioi komeni zaigu, honek aurrera jarraitzea», diote.
«Gogotsu» sartu dira lauak, Goiz Eguzkiren jardunean inplikatu eta lan egiteko. Dagoeneko eman dituzte aurreneko pausoak: «jubilatuen egoitza batzuekin jarri gara harremanetan, gauzak ondoen egiten dituzten horiekin, jendeak gomendatu dizkigunak, galdetu diegu zer eta nola egiten duten, nola antolatzen dituzten bidaia eta irteerak...».
Beraien ideiak eta beste egoitzetan jasotakoak, pixkanaka txertatuko dituzte. Baina gaur gaurkoz, dagoeneko berreskuratu du bere lasaitasuna Goiz Eguzkik, aurrerantzean ere egoitzaz eta bertako zerbitzuez gozatzen jarraitu ahal izango duten jakitun: «hau ezin genuen galtzen utzi».