Haur eta gaztetxoek gaur izango dute aukera, Dobera Euskara Elkarteak antolatuta, Ene Kantak taldearen Satorjator emanaldia ikusteko. Bi saio eskainiko dituzte, 16:30etan eta 18:30etan. Sarrera guztiak salduta daude.
Hainbat gomendio, sartu-irtenak errazteko
Emanaldiak izango dira Orona Fundazioak Galarretan daukan Oroka Ideo eraikinean; Hernanitik Galarretarako bidean dagoen eraikin multzoetan aurrenekoan. Ateak zabalduko dituzte, saio bakoitza hasi baino ordu erdi lehenago. Bertan izango dira Doberako langile eta laguntzaileak, sartu-irtenak errazten laguntzeko eta zalantzak argitzeko; baina jarraibideak zehaztuko dituzten seinaleak jarraitzeko ere eskatu dute.
Bestalde, gomendatu dute Oronara autobusean joatea, aparkatzeko lekua badagoen arren, erremonte jaialdi berezia izango delako Galarretan, eta jende asko espero delako.
Doberak eskerrak eman nahi izan dizkie, era berean, Orona Fundazioari, emanaldirako aretoa uzteagatik; eta Astigarragako Merke Azoka dendari eta Urnietako 2KN okindegiari, sarrerak saltzen laguntzeagatik.