Berdindu egin dute Hernaniko bi talde nagusiek, asteburu honetan. Baina zapore ezberdineko puntua izan da bakoitzarentzat. Emaitza ona izan zen Euskal Ligako neskentzat, Eibar bigarren sailkatuaren kontra lortu baitzuten berdinketa, Zubipen (1-1), Lizasoren golari esker. Puntu horrekin, zortzigarren postura igo da Hernani, Barakaldori aurrea hartuta. Toki erosoan daude txuri-berdeak, azkeneko postuak urrun utzita.
Gazi-gozoa izan zen, aldiz, Ohorezko Erregional mailako mutilek lortu zutena, Zarautzen kontra (2-2), Mikel Lizarazuren eta Navarroren golekin. Galdu gabe jarraitzen dute txuri-berdeek, baina zazpigarren garaipenaren bila joan ziren Zarautzera. Edozein kasutan, igoeraren lehian sartuta dago, 47 punturekin hirugarren. 49 dauzka Eibarrek eta 48 Anaitasunak, baina partidu bat gutxiago daukate, beraien artekoa.