Gure gizarteak zer jarri du ofertan azken aldian?
Markel Olaizola: Errexkeria. Sinplekeria. Harremanak axalekoak izatea, sakontasunik gabeak, plazer zakarrak.
Irakurgai kilikagarriren bat?
Arantza Oiarzabal: Esku bakarrarekin irakurtzeko kontuak.
Zein da elikagaia eta kutixiaren arteko desberdintasun nagusia?
Iñaki Errazkin: Kutixia askoz elaboratuagoa da, ikusten ez den prestaketa handia du.
Erotismoan, zer azpimarratuko zenuke fosforitoz?
Kaneko Esnal: Pertsonak, bakoitzak nahi duena, gogoa duena, errespetuz. Modak jarraitu gabe. Libre izan, libre bizi.
Maitasun kontuetan, ekintzailetza ala oposizioak egin?
Andoni Egia: Dudarik ez, ekintzailetza. Betirako denak irrika akabatzen du.
S.O.S! Hernani lurralde erotiko bihurtzeko, zer falta zaigu?
Aminata Diop: Kuadrilen sisteman aniztasun kulturala txertatzea.
Zein enkuadre behar du postureorik gabeko maitasunak?
Jon Urbe: Enkuadre ez perfektua, foko ez zehatza, argazki mugitua, trepidatua. Teknikoki desastre bat, baina sentimendu asko transmititzen dituena.
Xuxurlatuko zenidake maitasunean arrakasta izateko estrategia bat mesedez?
Xabi Ormazabal: Norbere burua maitatzen ikastea.
Errexa al da, betaurreko moreak jantzita ligatzea?
Maddalen Aduriz: Kar kar, zoritxarrez filtroa handia izaten da...
Txukuntzean etiketak erabiltzea gomendatzen duzu, harremanetan ere bai?
Maitane Ormazabal: Etiketak gauza objetibo eta funtzionaletarako bakarrik, mesedez. Harremanetan buruko minak besterik ez dituzte ekartzen.