Bueltan da Tilos 7 Pasa txapelketa, beste urte batez; eta 10garren edizioa izango du, pala torneo herrikoiak. Apirilean hasiko da, eta ekainera bitarte luzatuko da, finalak San Joan jaien aurretik jokatzeko.
Eta parte hartzeko, dagoeneko zabalik dago izena emateko epea. Datorren asteartera bitarte egin daiteke, otsailaren 25era arte, 629 248 111 telefono zenbakian. Bikote bakoitzako 40 euro izango dira, eta gehienez ere, 60 bikoterentzat dago tokia. Txapelketako kamixeta bana jasoko dute opari, palista guztiek.
Lau kategoria izango dira aurten ere, aurreko urtean bezalaxe: herrikoia, neskak, lehenengo maila eta bigarren maila. Partidu guztiak, ohi bezala, Tilosetako frontoian jokatuko dira, astean zehar. Ligaxka fasea izango da aurrena, eta kanporaketak ondoren, jakiteko zein ariko diren lau finaletan.