Hernanik Navarvoley liderraren bisita jasoko du, 16:00etan, kiroldegiko lehenengo pistan. Partidu zaila, baina era berean erakargarria dudarik gabe aurreneko sailkatuak eta bosgarrenak jokatuko dutena Euskal Ligako hamalaugarren jardunaldian.
Iruñerriko taldeak partidu bakarra galdu du eta hori lehendabiziko jardunaldietan gertatu zen. Hamar partidutik gora daramatza galdu gabe, nahiz eta aurreko astean larri ibili etxean.
Hala ere, Hernanik irabazteko aukerak baditu, baina horretarako aurreko astean baino hobe jokatu beharko du. Teknikoki akatsak egin zituzten eta horiek ez dituzte barkatzen nafarrek. Hernanik bederatzi partidu irabazi ditu eta bosgaren postua ziurtaturik du. Helburua oraingoz liderra gainditzea da.
Bihar neskak, Arantzazuko Amaren aurka
Bihar neskek hartuko dute lekukoa kiroldegian. Gipuzkoako Ligan jokatzen ari dira eta lider daude sailkapenean. 12:00etan Arantzazuko Amaren aurka jokatuko dute eta berez hernaniarrek irabazi beharko lukete, sailkapenari erreparatu ezkero, baina kirolean edozer gertatu daiteke. Kadete nesken bigarren taldeak ere etxean jokatuko du gaur, 12:00etan Fortuna 1-en kontra. Beste taldeak, hiru guztira, kanpoan ariko dira.