Denbora bukatzen ari zaio Hernaniri, beste denboraldi batez errugbiaren Ohorezko Mailari eusteko. Gogo eta kemenik ez dute falta izan trikoloreek orain arte, ezta joko onik ere, partidu askotan; baina garaipenek eta puntuek ihes egin diete.
Eta bi asteburuko atsedenaren ondotik, ligako azken txanpari ekiteko prest daude hernaniarrak. Hemendik aurrera, zailtasunak zailtasun, irabazi beste aukerarik ez daukate, ahal duten partidu guztietan. Aurrenekoa gaur izango dute, etxean, zaleen babesean. Arratsaldeko 16:00etan hasita, Santanderreko Independiente hartuko dute Landaren; sailkapenean seigarrena.
Maila haundiko taldea izango da bisitan, beraz; baina horri erreparatu gabe zelairatu beharko dute trikoloreek, eta garaipena bilatu, hasieratik bukaerara.
Denboraldi honetan bertan, erreferentzia ona dauka Hernanik: joaneko partiduan, Santanderren, puntu bakarreko aldearekin galdu zuen (22-21).
Hiru partidu garrantzitsu, eta martxoan etena berriro
Gaurko partiduaren ondoren, bi partidu garrantzitsu izango ditu Hernanik, hurrengo bi asteburuetan: Santboiana hartuko du Landaren, eta Burgosen zelaian ariko da. Eta horren ondoren, bi asteburuko etena izango dute berriro, martxoan.
Orduan, azkeneko bost partiduak besterik ez dituzte faltako: Alcobendas eta Bathco hartuko dituzte Landaren, eta VRAC, EL Salvador eta Bartzelonaren zelaietara egingo dute bisita. Beraz, garaipenak gaurtik pilatzen hastea, ezinbestekoa.
Bultza Ligakoa, Bilbon
Bestalde, asteburu honetan jokatuko du Hernaniko talde barneratzaileak, Bultza Ligako hirugarren jardunaldia. Bilboko El Fango zelaian ariko dira trikoloreak, gaur bertan, eta Uni Bilbao taldea izango dute aurrean.
Horrekin, ligako aurreneko itzulia bukatuko dute.