Orokorrean emaitza onak lortu dituzte asteburuan Hernaniko pelotariek. Partida aipagarriena bi hernaniarren artean jokatu zen eta kadete mailan. Donostian Pilotarien Txokoa txapelketa jokatzen ari dira eta bertan finalerdietarako sailkapena zegoen jokoan. Unai Etxarri atzelari hernaniarrak sailkapena lortu du, Iztueta aurrelari bizkaitarrarekin batera. Jon Jara hernaniarra eta Peñalver nafarra menderatu zituzten 22-18 eta semifinaletarako sailkatzea lortu dute.
Udaberri txapelketa ofizialean sei garaipen eta partidu bakarra galdu da. Arabaolaza- -Martin bikote kadeteak bakarrik galdu zuten eta kategoria berdinean Jara-Etxarri bikoteak, hemen elkarrekin, eta Altuna-Zugasti seniorrek partidu guztiak irabazi dituzte oraingoz txapelketa honetan.
Jon Jarak hirugarren partidu bat ere jokatu du Zizurren. Hemen lau'terdian galdu egin zuen finalaurdenetan.
Trinketean lau garaipen eta bi partidu galdu dira
Trinketean seitik lau garaipen lortu dira. Seniorretan Pagola eta Alvarezek beste garaipen bat batu dute eta nahiz eta Arluziaga-Alegria kadeteek eta Insausti II-Lasa jubenilek lehenengo partiduak galdu, hurrengo azken fasera sailkatzeko aukera guztiak mantentzen dituzte.