Easo Politeknikoko Gizarte eta Kirol animazio eta irakaskuntzako ikasleak Elkartasun Festa antolatzen ari dira larunbaterako, Aspanogi elkartea, minbizia daukaten haurren guraso elkartea laguntzeko.
Ikasle horietako bat da Ainhitze Kalonje hernaniarra, eta herritar guztiei egin diete deialdia, festan parte hartzeko. Añorgan izango da, eta «bertan bildutako dirua Aspanogi elkarteari emango» diote.
Porrotx, dantzari eta aizkolariak
Larunbatean, goizeko 10:00etan emango diote hasiera egitarauari: tonbola, twister edota dardo eta saskibaloi egokitua, puzgarriak eta eskalada izango dira aukeran. Hasiera ekitaldia, hala ere, 10:30etan egingo dute, Beñat Gaztelumendi bertsolariarekin, eta segidan, kantujira egingo da.
Gero, Porrotx pailazoak ikuskizuna emango du 11:30etatik 12:00etara, eta ordu horretan Iker Vicente eta Eneko Saralegik hartuko dute erreleboa, aizkoran. Dantzariak izango dira segidan, 12:30etatik 13:00etara, eta denontzako zunba saioarekin bukatuko da eguna, 13:45etan.