Inauteriak gerturatzen ari diren susmoa zeukanak, dagoeneko ez dauka zalantzarik. Inauterien iragarle finaren paperean aritu ziren asteburuan, Hernanin, Kaldereroak.
Bi bider atera ziren kalera, urtero bezala, zartagiak eta lapikoak jo eta hain karakteristiko duten hotsa zabaltzera. Ostiral arratsaldean egin zuten irteera, Langile ikastolako Kaldereroek, eta Plaza beteta, egin zieten deia aurtengo Inauteriei.
Eta larunbat arratsalderako jarri zuen hitzordua, ohi bezala, Elur-Txori elkarteak. Afari eder baten ondoren, Kaldereroen konpartsa jendetsua atera zen kalera, hartzarekin batera, herriko kale eta plazak alaitzera.
Kaldereroen jantzi koloretsuek, bidea egingo diete orain, mota guztietako mozorroei. Inauterietarako bi aste besterik ez dira falta eta!