Emanaldi berezia izango da Biteri kultur etxeak hartuko duena, gaur iluntzean. «Ibilbide luzeko eta nortasun eta izen haundiko hiru artista» igoko dira taula gainera, Hezurbeltzak proiektuarekin; eta emigrazioa, gizarteko pertsonaia baztertuak eta haien inguruko istorioak plazaratuko dituzte kantuan, 20:00etan hasita.
Bertsolari batek eta bi musikarik osatzen dute hirukotea: Jon Maia ariko da kantuan, Jesus Prieto Pittik gitarra akustikoa joko du, eta eskusoinuarekin ariko da Gorka Hermosa.
Emanaldirako sarrerak, hilaren 21etik daude salgai, 7,5 euroan. Eta sarrerarik geratzen bada, gaur bertan eskuratu ahal izango dira, Biterin.
Poetika, umorea, kritika eta edertasuna uztartuz, «unibertso propio bat»
Izen berarekin, diskoa ere kaleratu zuen Hezurbeltzak proiektuak, 2018an. 13 abesti dira, eta izenburuak esanguratsuak dira: Hemen gaude; Jon Maiaren agurra 1997 (urte hartako Bertsolari Txapelketa Nagusiaren finalean kantatu zuena, bere arbasoei eskainia); Belarrimotzak; Coplas a la abuela María Luisa; Aurresku del sur; Arbaso kasualak; Gernika 1937/4/26; Olerkaria; Gure amaren erditze baldintzak; Larrosa beltza; Maleta susmagarria; Denbora ez da pasatzen; eta Munduak leku bat.
Poetika, umorea, kritika eta edertasuna uztartzen dituzte abestietan, emigrazioaz edota gizarteko pertsonaia baztertuez aritzeko, besteak beste. Eta zuzeneko emanaldietan, «musika gainditzen duen unibertso propio bat» sortzen dute. Izan ere, «atrezzo eta giro bakan bat» ere izango du emanaldiak.
«Hona etortzeko miseria utzi zuen hegoaldeko jendeari omenaldia da», azaldu dute.