Asteburu zaila izan dute Hernaniko boleibol taldeek, eta porrota bana jaso dute, senior mailakoek. Udapa Lankideren kontra galdu zuten mutilek (0-3), etxean; eta Kostkasen kantxan jaso zuten porrota neskek (3-2).
Euskal Ligako laugarren postura igotzeko aukera zuten mutilek, eta espero bezala, partidu berdindua eta borrokatua izan zen. Aurreneko jokoak, 23-21 aurretik egon ondoren, ihes egin zien hernaniarrei (23-25); eta bigarrenean ere, azkeneko puntuetan hobeto ibili ziren gasteiztarrak (23-25). Partidua maldan gora zutela, hirugarrena gaizki hasita eta lesioak ere tarteko, 17-25 irabazi zuen Lankidek, garaipena eskuratzeko.
Partidu gogorra izan zuten neskek ere, Gipuzkoako Ligan; eta denboraldiko aurreneko porrota jaso zuten. Baja batzuekin iritsi zen Hernani, eta azkeneko puntura arte borrokatu arren, galdu egin zuen. 16-25 irabazi zuten aurrenekoa; 25-20 eta 25-19 galdu hurrengo biak; eta laugarrenean berdindu arren (19-25), galdu egin zuten joko erabakigarria (15-9).