Jakina da edozer gerta daitekeela Hernani eta Ordiziaren arteko derbietan; baina atzokoan, bere nagusitasuna agerian utzi zuen talde goierritarrak, partiduaren hasieratik. Eta garaipen erosoa eskuratu zuen Landaren (15-24).
Irabazteko aukerarik ez izanagatik ere, ordea, defentsako bonusa lortzeko puntu-puntuan izan ziren hernaniarrak. Entsaioa lortu zuten, denbora bukatuta zela, eta eskura izan zuen zazpi puntura gerturatzea, Loketi Manuk; baina huts egin zuen konbertsioa, Tongakoak.
Hasieratik utzi zuen bere nagusitasuna agerian Ordiziak, eskura jokatzen zuenean min eginez, eta formazioetan indarra erakutsiz. Horrela lortu zuen aurreneko entsaioa, bosgarren minutuan; eta gertu izan zuen bigarrena, ordu laurdenerako.
Goierritarren indarrari eustea tokatu zitzaion Hernaniri, 25garren minutura arte; eta hortik atsedenaldira jokatu zituzten minutu onenak, trikoloreek: Ordiziaren saiakerak kate motzean lotu, eta jokaldi onak haritu zituzten, baita entsaioa gertu izan ere. Jokoa orekatu izanak konfiantza eman behar zien bigarren zatirako. Baina orduan, aurreneko zatiko azkeneko jokaldian, bigarren entsaioa lortu zuten ordiziarrek, Hernani bat gutxiagorekin zela aprobetxatuz (0-12).
Bigarren zatia hasi eta berehala, partidua erabakita
Bigarren zatiaren hasieran berreskuratu zuen esperantza Hernanik, Loketi Manuren zigor kolpearekin (3-12). Baina berehala uxatu zituen zalantza guztiak, Ordiziak: 10 minututan bi entsaio lortu, eta erabakita utzi zuen partidua (3-24).
Trikoloreak ez zeuden amore emateko, hala ere; eta defentsako bonusa eskuratzeko segi zuten lanean. Horrela lortu zuten zigor entsaioa aurrena, 72garren minutuan, Ordizia bi gutxiagorekin zela aprobetxatuz (10-24); eta bigarren entsaioa denbora beteta, Jose Luciano Abeciaren eskutik. Konbertsioak utzi zituen punturik gabe.