Antziola Berriko haur parke estalia, atletismo pistaren ondoan dagoena, «urgentziaz» hobetzeko beharra azaleratu du Hernaniko PSE-EEk. Joan den astean, Tokiko Garapenerako Batzordean, eskatu zuen gaiari heltzea, eta hobetzeko plan bat proposatu zuen. Izan ere, nabarmendu du «hutsuneak» dauzkala.
Horrela, Ricardo Crespo bozeramaileak adierazi du «parkeko garbiketa hobetu» egin behar dela, eta hesi bat jarri behar dela, txakurrak bertara sartzea saihesteko: «horiekin, hobetuko genuke haur parkeko segurtasuna eta garbiketa».
Era berean, eskatu du parkearen ondoan komun publiko bat jartzea: «haurtzaindegian badago bat, baina haurrek parkearen ondoan egiten dituzte beraien egitekoak, eta horrek arazo sanitario bat dakar. Beraz, premiazkoa da horri konponbidea ematea, jende asko ibiltzen baita inguru horretan».
Haur haundiagoentzat, jolasak
Bestalde, PSE-EEk azaldu du, adin askotariko haurrak joaten direla parkera, baina parkea berritu denetik, txikienentzako jolasak bakarrik dauzkala: «lehen, bi txirristra, kolunpioak eta zubi kolganteak zeuzkan haundiagoentzat, baina orain txikienentzat da bakarrik».
Berdeguneko garbiketa hobetzea ere eskatu du: «zaborrez beteta dago, eta kalba asko dauzka, bizikletak pasatzen direlako etengabe. Bideko lurra ere hobetu behar da; oso hondatua dago konposta-etxetxoaren ondoan».
Eta azkenik, eskatu du jarraipena emateko, duela bi urte hasitako zuhaitz eta farolen aldaketei: «zuhaitz batzuk aldatu ziren, baina badaude gehiago okerrak eta gaixo itxurarekin. Farolak ere hainbat aldatu ziren, baina margotu gabe utzi zituzten. Funtzionatzen ez duten farolak aldatu, eta margotu gabekoak margotu behar dira».