Binakako Txapelketaren finaletik hilabete igaro ez denean, gaur bertan ekingo diote hurrengo txapelketari, erremontistek. Eta oraingoan, buruz buru ariko dira, Master Torneoan.
Asteartean aurkeztu zuten aurtengo edizioa, eta sei erremontista ariko dira lehian; joan den urteko Buruz Buruko Txapelketako sei onenak, hain zuzen ere: Endika Barrenetxea, Javier Urriza, Endika Urrutia, Imanol Ansa, Xabier Azpiroz eta Ander Goikoetxea (Josetxo Ezkurra lesionatua ordezkatuko du berak). Semifinaletan ekingo dio Barrenetxea hernaniarrak, Urrizak bezalaxe.
Gaurkoan, Ansa II eta Azpiroz ariko dira, estreinako partiduan. Arratsaldeko 16:00etan hasita Galarretan, final laurdenetako partidua izango da haiena; eta irabazleak, Barrenetxearen kontra jokatuko du semifinaletan, otsailaren 1ean.
Final laurdenetako beste partidua, larunbat honetan jokatuko dute, Goikoetxea Vk eta Endikak; 16:00etan Galarretan hori ere. Haiek, Urriza iazko txapelduna daukate zain semifinalean, otsailaren 1ean baita ere.
Finala, otsailaren 8an
Otsailaren 1ean jakingo da, beraz, zein bi erremontista ariko diren Masterreko finalean. Astebete beranduago jokatuko da, hilaren 8an, bi semifinaletako irabazleen artean.
Seigarren txapela bilatuko du Urrizak; laugarrena segidan. Izan ere, 2013an eta 2014an lortu zituen aurreneko garaipenak, eta Utergak beste bitan irabazi ondoren, bereak ditu 2017, 2018 eta 2019ko txapelak ere. Bolada hori eteten saiatuko da Barrenetxea, 2019an Buruz Buruko Txapelketa irabazi izanaren konfiantzarekin. Orain badaki, Urriza garaiezina menderatzeko gai dela, ondo jokatuz gero.
Hamargarren edizioa izango du aurtengoa, Master Torneoak; eta momentuz, hiru erremontistaren izenetara mugatzen da txapelketaren palmaresa: Urriza eta Uterga, eta Koteto Ezkurra, aurreneko bi edizioak irabazi zituena, 2011n eta 2012an.