Euskalnafar oroimen lekuak gai hartuta, lau dokumentalen emanaldia antolatu du Hernani Errotzenek, gaurko. Biteriko areto nagusian izango da, arratsaldeko 19:00etan hasita; eta Nabarralde Fundazioak egindako lau dokumental jarriko dituzte bertan: Zer dira oroimen lekuak; Castillos de defensa baskonabarra; Oñati, herri bizia; eta Arantzazu harriz herri. Gaztelaniazko azpitituluak izango dituzte, azkeneko bi dokumentalek.
Emanaldi bakoitzaren ondoren, solasaldi labur baterako tartea egingo dute, gaiaren inguruan hausnartzeko, antolatzaileek aurreratu dutenez.
«Memoria historikoa oinarrizkoa da, komunitate nazional baten identitatea eraikitzeko. Herri baten oraina moldatu duten gertaeren pertzepzioaz ari gara; unean uneko gertaera tragiko edo pozgarrietatik harago, geroa diseinatzeko ezinbesteko den hizkera propioaren beharraz, alegia», adierazi du Hernani Errotzenek.
'Oñati, herri bizia' dokumentala, estreinakoz
Gaur jarriko dituzten dokumentalen artean, gainera, bada bat aurrenekoz jarriko dutena: Oñati, herri bizia dokumentalaren estreinaldia izango da. Beñi Agirre eta Jokin Labayen hernaniarrek egin dute. Abenduaren 17an aurkeztu zuten Biterin, hernaniar talde baten aurrean, eta gaurkoa izango da aurreneko emanaldia.
Oñatiko historia kontatzen du dokumentalak, oroimen lekuak azaleratzeko asmotan. Horretarako, herriko ondarea, gertaera eta pertsona ezagunak bildu dituzte, eta Euskal Herriko edo Nafarroako testuinguruan txertatu dute herri jakin bateko historia. Besteak beste, honako galderei erantzuten die: Noiz eta nola ematen dira herriaren aurreneko pauso historikoak? Zein gertaerek markatu dute bere ibilbidea gaurkora iritsi arte?
«Historia beste modu batean kontatzeko ahalegin bat da», nabarmendu dute dokumentalaren egileek.