Hiru final jokatu zituzten joan den asteburuan, esku pelotari hernaniarrek; eta txapela ekarri zuen Unai Alvarezek, trinketeko Gipuzkoako Txapelketaren finala irabazita, nagusien bigarren mailan. 40-25 hartu zuen mendean Enrike Huizi usurbildarra, baina markagailuan alde haundia izanagatik ere, asko sufritu zuen hernaniarrak.
Izan ere, oso gogorra izan zen partidua, eta luze jo zuen, ordu eta laurdeneko iraupenarekin. 16na berdindu zuten, eta hortik aurrera, partidua hautsi zuen Alvarezek, tartea eginez; baina azkeneko tantoetan arazo fisiko haundiak izan zituen, eta gogotik sufritzea tokatu zitzaion, txapela janzteko. Garaipen garrantzitsua izan da berarentzat, aurreneko txapelketa baitzuen, hainbat urtetan jokatu gabe egon ondoren. Modalitate honetan daukan esperientzia baliatu zuen Munduko txapeldun ohiak, finala irabazteko.
Mattin Arluziagak eta Xabier Apaolazak, galdu
Gipuzkoako trinketeko finala jokatu zuen Mattin Arluziaga kadeteak ere, Behar Zanako Aranbururen kontra. Baina gehiago izan zen kontrarioa hasieratik, eta fisikoki hobeto eutsi zion. Horrela, 15-30 galdu zuen hernaniarrak, eta azpitxapeldun bukatu du, txapelketa bikaina jokatu ondoren. «Etorkizunean asko jokatu dezake modalitate honetan», nabarmendu dute Hernaniko pelota elkartetik.
Eta Arluziaga bezala, txapelik gabe bueltatu zen Xabier Apaolaza ere, Zangozatik. Bertako txapelketako finala jokatu zuen lau t'erdian, eta galdu egin zuen, Larraulgo Iriarteren kontra (11-18). Biak primeran aritu ziren zazpina berdindu arte, baina hurrengo tantoa izan zen klabea: oso gogorra izan zen, Iriartek lortu zuen, eta esfortzu hori larrutik ordaindu zuen Apaolazak; bost tantoren aldea lortu zuen Larraulgoak gero.