Aurreko astean Euskaraldia aurkeztu ondoren, dagoeneko jarri da martxan Dobera Euskara Elkartea, girotzen hasteko. Eta asmo horrekin antolatu du gaur arratsalderako, Hartu nazazu euskaraz mahai ingurua.
Biterin izango da, 19:00etan hasita, eta Jon Maia Soria bertsolariak gidatuko du saioa. Irekia eta doakoa izango da sarrera, eta bertaratu eta parte hartzera gonbidatu dituzte herritar guztiak, elkartetik.
Mahai inguruan, euskera eta etorkinak uztartuko ditu bertsolari urretxuarrak. Eta horretarako, bertan egongo dira, batetik, euskera ikasi duten etorkinak; eta bestetik, azken urteetan etorri direnak. Guztiek hitz egingo dute, euskerarekin izan duten harremanaz, eta azalduko dute «gure errealitate linguistikoaren inguruan duten ikuspuntua», Doberak aurreratu duenez.
Herri mailan Euskaraldia girotzen hasteko, aurreneko ekitaldia izango da gaurkoa; eta gehiago ere izango direla jakinarazi dute.
Bide horretan, Euskaraldiarekin bat egin eta euskera erabiltzeko deia luzatu du Hernaniko Udalak ere; eta bideo sorta bat osatu du, Piztu pilotua izenekoa, herritarren artean euskeraren erabilera sustatzeko. Horietan, «Euskararen Jedia» izan, eta saltokietan, euskaldun zahar eta berrien artean zein taldean, gaztelerara jotzeko tentazioari eusteko deia egiten diete herritarrei. Udalaren YouTubeko kanalean ikusi daitezke.