Xabier Apaolaza pelotari jubenila Zangozako Txapelketako finalera sailkatu da, finalerdian 18-9 irabazi eta gero. Zugarralde taldeko Maiza nafarra zuen aurkari, eta ongi nagusitu zitzaion hernaniarra. Azken urte honetan bere maila asko igo du Apaolazak, eta horri esker emaitza hobeak ari da lortzen. Finalerdi borobila jokatu zuen, eta aste honetan bertan izango du finala Zangozan.
Orokorrean, pelotari hernaniarren asteburuan, zortzi garaipen eta lau porrotarekin, emaitzak ez dira oso onak izan, taldetik diotenez: «zapore gazigozoa utzi digute».
Trinketeko finaletara, Arluziaga eta Alvarez
Gipuzkoako Trinkete Txapelketan, bost semifinal jokatu dituzte. Mattin Arluziaga finalera sailkatu da kadeteetan, Behar Zanako Aranbururi 30-29 irabazi eta gero. Partidu estua izan zen, eta azken tantoan erabaki zen dena. Maila bereko beste finalerdian, Unai Etxarrik galdu egin zuen Behar Zanako beste Aranbururen kontra 30-22.
Jubeniletan Oinatz Insaustik 35-16 galdu zuen, Behar Zanako Olasagastiren; kontra eta Mikel Lasak ere galdu (35-8), Oiarpeko Aranbururen aurka. Unai Álvarez seniorra, ordea, finalera sailkatu da, Urnietako Aldunberriri 40-26 irabazita.