Ondo hasi dute urte berria, Hernaniko boleibol taldeek; eta sei partidutik, bost irabazi dituzte, joan den asteburuan.
Berriozarren aritu zen mutil seniorren taldea, Navarmutilak taldearen kontra, Euskal Ligan. Eta desorekatua izan zen partidua, nabarmen gehiago izan baitziren hernaniarrak: hiru jokotan lortu zuten garaipena. 20-25 irabazi zuten aurrenekoa, eta erraz lortu zuten bigarrena, 10-25eko emaitzarekin. Hirugarrenean ere, ez zioten aukerarik eman, talde nafarrari, eta 14-25 irabazita, garaipen erraza ekarri zuten Hernanira, aurreneko itzulia bukatzeko. Denboraldi erdia jokatuta, bosgarren postuan dago sailkatuta Hernani, Udapa Lankide laugarrenarekin berdinduta, sei garaipen eta hiru porrotarekin.
Gainera, aurreneko itzulian partidu gehiago jokatu dituzte kanpoan, etxean baino. Hortaz, etxean dauzkate gehiago orain, bigarren itzulian, eta sailkapenean gora egitea izango dute helburu, liga bukatu bitartean. Une honetan, soilik garaipen bat gehiagorekin daude Voleyviña eta Navarvoley.
Irekieran bezala, Gipuzkoako Ligan ere nagusi neskak
Neska seniorrek, bere aldetik, hasiera eman zioten Gipuzkoako Ligari, behin Irekiera Txapelketa bukatuta. Eta aurreko hori porrotarik gabe bukatu bazuten, nagusitasunez ekin diote berriari ere: 0-3 irabazi zuten Urretxun, Goierriren kontra.
Baja dezente izan arren, ez zuten barkatu hernaniarrek, eta hasieratik izan ziren gehiago. 9-25 irabazi zuten aurreneko jokoa, 17-25 bigarrena, eta estuagoa izan zen hirugarrena, baina partidua ixtea lortu zuten, 23-25 nagusituta. Oraingoz, denboraldi borobila daramakite neska seniorrek, jokatutako partidu guztiak irabazita.
Porrota bakarra, neska kadeteen talde batek
Gainerakoan ere, asteburu bikaina izan da Hernaniko taldeentzat. Neska infantiletan, bi taldeek lortu zuten garaipena. Tolosan jokatu zuten aurreneko urtekoek, Laskorain taldearen kontra; eta partidu gogorrean, 1-3 irabazi zuten: 24-26, 12-25, 25-14 eta 22-25. Errazago nagusitu zen infantilen beste taldea, bigarren urtekoena, Lizardiren kontra: 25-5, 25-20 eta 25-21.
Neska kadeteetan jaso zuen, taldeetako batek, asteburuko porrota bakarra. Aurreneko urtekoek ez zuten aukerarik izan, Fortuna 1 taldearen kontra, eta 0-3 galdu zuten etxean: 8-25, 18-25 eta 15-25. Alderantziz gertatu zitzaion bigarren urtekoen taldeari. Etxean aritu ziren haiek ere, Lizardiren kontra, eta erraz nagusitu ziren: 25-10, 25-9 eta 25-16. Denboraldi sendoari segida eman zioten horrela.